Ambon.Vibes.com – Di bawah kolong Jambatang Merah Putih, sabalah unjung Galala, anana muda kreatif Kota Musik Ambon Manise bakumpul rame-rame, Sabtu (31/1/2026) tadi malang. Barang, di tampa itu ada Gala Beat Feat 2026.
Sadap paskali lia Teluk Ambon jadi latar balakang. Sadangkan di atas panggung deng kuliking panggung, ada kreativitas anana muda, musik, iman, deng ekonomi kreatif manyatu dalang festival yang angka nae 22 penampil, bae yang tampil solo mopun deng kelompok. Jumlah samua talent yang nae panggung dari panampil partama sampe laste ada 136 orang.
Penonton sanang tagal dapa manja deng musik, vokal bagus-bagus, tari tradisi sampe tari modern. Ada yang memang belum talalu top, mar ada yang paleng top dan punya reputasi internasional. Ada JP Band, Palita Project, Mr.E (Eros Riry), Rachel Jamlaay, Amboina Bananas, Coo Project, NBNG, NL Project, D Bercanda Kids Dance, Sanggar Lima Belas, 1man+Band, Eighteen Band, Jamrah Arm, Sujegat, Iren Paliama, Mitha Sitaniapessy, Kayla Harmusial, Buce Latumaelissa, Liberto Noija, Sanggar Wairuhu, dan Talarasa.
Gala Beat Fest 2026 ini, akang jadi dar prakarsa Belang Musika Maluku (BMM). Yayasan BMM biking festival ini, bakarja sama deng AMGPM Ranting 4 Gatik Cabang Kyrie Eleison 1, Daerah Pulau Ambon Timur. Dong juga dapa beking dar Pemerentah Kota Ambon malalui Dinas Pariwisata dan Kebudayaan.
Kapala Dinas Pariwisata dan Kebudayaan Kota Ambon Christian Tukloy, S.Pi, ada datang tadi malam. Salaeng baca Wali Kota Ambon pung sambutan, Kadis juga pukul tifa par biking resmi festival.
Di muka pasarta festival, tamu undangan deng panontong yang biking pono kolong jambatang, Christian tegaskan Gala Beat Fest bukang sakadar partunjukan hiburan, mar juga jadi bageang dari karja-karja bangong ekosistem musik deng ekonomi kreatif basis komunitas di Kota Ambon.
“Sorang pilot bisa jadi hebat tagal jam tarbang. Bagitu juga panyanyi deng musisi. Dong bisa tanae kalo ada ruang par tampil, tauji, deng bisa unju potensi. Festival ini jadi media par talenta muda Ambon bisa lahir, lalu eso-eso jadi top di Ambon bahkan Indonesia,” ujar Christian.
Dia kase tau, sapanjang taong 2026, nanti ada lima event bagini dar Belang Musika Maluku. Sadangkan Dinas Pariwisata dan Kebudayaan sandiri mo biking sakitar sapuluh event par buka ruang ekspresi yang lebe loas par musisi deng palaku kreatif di Ambon.
Manurut Christian, Gala Beat Fest su kas unju wajah nyata ekonomi kreatif. Bukang cuma kas datang seniman panggung mar juga palaku UMKM, komunitas kreatif, deng pamanfaatan ruang tabuka publik sabagae pusat aktivitas seni deng ekonomi masyarakat.
“Ini bukang cuma panggung panyanyi. Di sini ada UMKM, ada komunitas, ada ekonomi kreatif yang bagara, tarangke samua dalang satu ruang barsama,” tambah Christian.
Wali Kota Ambon Bodewin Wattimena dalang sambutan yang Christian ada baca akang, ada kase katagasang, seni musik deng tari marupakan bageang integral dar kabudayaan Maluku. Bukang sakadar hiburan, mar jadi sarana pawarisan nilai-nilai lokal deng identitas jati diri masyarakat lintas generasi. Kagiatan macang bagini, manurut Bodewin, jadi ruang baku dapa produktif antara seni, ekonomi, deng masyarakat.
Wali Kota Bodewin juga tekankan UMKM pung rol panting sabage tulang punggung ekonomi rakyat yang parlu wadah promosi terbuka, inklusif, deng barkalanjutan.
Masih dalang sambutan, Christian ada kase tau Kota Ambon su dapa pangakuan internasional sabage City of Music d. Salaeng itu, salah satu event unggulan kota ini, Amboina International Music Festival, su dapa dukung Kementerian Pariwisata sabage bageang dar Kharisma Event Nusantara (KEN), jadi promosi deng pandanaan pasti dar pemerentah pusat.
Pemerentah Kota Ambon, kata Christian, juga tarus dorong pamakean barbage titik ruang terbuka publik yang sakarang ada kalola akang deng komunitas par jadi lokasi event seni dan musik karja sama dengan komunitas musik Maluku.
Gala Beat Fest 2026 menjadi jadi buktu nyata kolaborasi pemerintah, komunitas seni, pemuda gareja, deng pelaku UMKM par biking kuat identitas Ambon sabage City of Music yang tumbuh dar komunitas, sakaligus dorong partumbuhan ekonomi lokal barbasis kreativitas anana muda. (Leonardo Manuputty)
