AmbonVibes.com – Wali Kota Ambon Bodewin Wattimena bilang Pemerentah Kota Ambon seng mo tarima niat padagang par bale bajual dalang Terminal A dan B Mardika par maso Har Kajadiang 2025 deng Tambaru 2026 (Nataru).
Wali Kota pung sikap karas ini antua pegang, maski ada swara dar anggota Dewan Perwakilan Rakyat Daerah (DPRD) Kota Ambon yang minta Pemkot kase kalonggaran waktu par padagang bajualan di area terminal.
Manurut Wali Kota, panartiban yang pemerentah biking iini bukang mo kas mati usaha padagang, malaengkang kas kumbali fungsi terminal sabage sarana transportasi umum yang salama ini tabulengkar tagal alih fungsi jadi pasar.
“Skali katong larang, satarusnya akang katong larang. Pemerentah musti konsisten. Seng bisa terminal alih fungsi jadi pasar,” tegas Bodewin di Ambon.
Wali Kota tekankan, Terminal Mardika marupakan fasilitas publik yang par palayanan transportasi, bukang ruang aktivitas badagang. Dia nilai, pambiaran orang bajual di terminal justru biking para kamacetan, samua jadi seng taator, deng ganggu kapantingan masyarakat loas.
“Penataan ini bukang kabijakan sesaat. Katong inging terminal kumbali di fungsi asli deng tartib. Kalo katong kase kalonggaran sakarang, eso-eso akang tarus jadi kabiasaang,” ujarnya.
Menurut Bodewin, konsistensi kabijakan jadi kunci dalang mnata wajah Kota Ambon, khususnya di kawasan Mardika yang jadi pusat aktivitas ekonomi deng transportasi.
Maski tegas, Wali Kota bilang Pemerentah Kota Ambon seng tutu mata par pedagang. Dia sebut, Pemkot su siap tampa alternatif par bajual legal dan representatif, yakni di lantai atas Pasar Mardika Baru yang sampe sakarang balong dapa pake deng bae.
“Katong harap begini, Pasar Mardika Baru itu kan masih ada ruang kosong di atas. Kanapa seng bajual di atas? Jang pilih-pilih tampa bajual. Kalo samua bajual di dalang, orang pasti ka sana,” jelasnya.
Manurut Bodewin, deng solusi itu, pamerentah seng cuma larang, mar juga sadia ruang usaha yang layak par aktivitas ekonomi tatap bajalang tanpa langgar tata ruang kota.
Kontroversi panertiban ini muncul tagal padagang saparuh bataria dong ilang mata pancaharian pasca panataan terminal, bulang-bulang lalu. Anggota Komisi II DPRD Kota Ambon Hadiyanto Junaidi minta Pemkot kase parhatian serius par padagang kacil.
Maski akui terminal bukang tampa bajual, DPRD usul kase kalonggaran waktu, khususnya mulai jam 18.00 WIT sampe malang hari, deng alasan aktivitas transportasi di terminal su bakurang.
“Benar fungsi terminal bukang par orang bajual. Mar katong harap Pemkot bisa kase ruang par dong. Paling seng, ada tampa yang su sadia,” ujar Hadiyanto.
Maski ada swara bagitu dar DPRD, Wali Kota Ambon tetap pegang prinsip. Dia pilih solusi permanen malalui pamanfaatan Pasar Mardika Baru dar pada kase kalonggaran sementara yang dinilai berpotensi biking rusak konsistensi panegakan atorang.
Kabijakan ini kumbali jadi pilihan Pemkot Ambon par seimbangkan katertiban tata kota deng kapantingan ekonomi masyarakat, deng cara pindah aktivitas ke tampa yang su tasadia secara resmi. (red)
