AmbonVibes.com – Pemerentah Kota (Pemkot) Ambon deng DPRD Kota Ambon resmi tekeng Nota Kesepakatan Kebijakan Umum Anggaran (KUA) deng Prioritas dan Plafon Anggaran Sementara (PPAS) APBD 2026. Acara tekeng KUA-PPAS bajalang dalang Rapat Paripurna di Gedung DPRD Kota Ambon, Rabu (26/11/25).
Wali Kota Ambon Bodewin Wattimena tegaskan, KUA–PPAS ini dong biking tagal ada amanat regulasi yang pemerentah daerah musti iko akang.
“Iko Pasal 169 PP Nomor 12 Tahun 2019, kapala daerah wajib sampekan rancangan KUA dan PPAS ka DPRD par dapa bahas dan dong akor sama-sama,” ujarnya.
Wali Kota bilang, rancangan KUA–PPAS su lebe dolo dapa kase ke DPRD bulang kalamareng.
“Tanggal 11 Oktober 2025, katong su kase rancangan KUA dan PPAS, dan hari ini katong akor dalang nota kesepakatan,” katanya.
Bodewin mangaku proses par bahas KUA-PPAS bajalang seng gampang tagal kondisi fiskal daerah dapa tatindis paleng banya.
“TAPD deng Banggar DPRD bakerja dalang situasi keuangan daerah yang paleng kurang-kurang,” jelasnya.
Transfer ke Daerah (TKD) dar pemerentah pusat yang taturung, akang jadi tantangan paleng basar par Kota Ambon.
“Alokasi TKD taong 2025 sabasar Rp971 miliar lebe, akang taturung lebe dar Rp132 miliar par taong 2026,” terangnya.
Deng kemampuan fiskal yang taturung, pemerentah musti ambe langkah ati-ati dalang kelola APBD taong muka.
“Samua balanja daerah 2026 nanti mo pilih-pilih deng ati-ati. Pemkot nanti evaluasi saban bulang bajalang,” tegasnya.
Bodewin juga buka kamungkinan opsi pambiayaan laeng kalo kondisi fiskal lebe tatindis.
“Kamungkinan paleng tarbae itu biking pinjaman daerah,” tambahnya.
Dalam nota kesepakatan, dong tetapkan pendapatan daerah 2026 Rp1,125 triliun, balanja daerah Rp1,291 triliun, dan pembiayaan daerah Rp200 miliar pada pos penerimaan pembiayaan.
Wali Kota tegaskan, arah kabijakan pembangunan taong 2026 tetap iko tema taong kadua RPJMD Kota Ambon, yaitu “Pemerataan Jaminan Sosial dan Ekonomi untuk Ambon Sejahtera”, yang dapa ure dalang dalapang prioritas pembangunan daerah.
KUA–PPAS yang su tekeng ini, akang jadi pijakan awal par Pemkot dan DPRD pastikan program pembangunan bisa bajalang tarus, maski baku tangada deng tantangan fiskal yang seng ringan. (Keket)
