AmbonVibes.com – DPRD Provinsi Maluku sorot kinerja Pasar Mardika yang dong nilai jao dar target, skaligus akang ancam proyeksi fiskal daerah. Taong ini, pendapatan pasar sentral di Kota Ambon cuma dapa Rp900 juta, jao di bawah takser kamuka Rp18 miliar. Takser paleng bar Rp5 miliar, tetap sa akang seng war.
Katua DPRD Provinsi Maluku Benhur Watubun bilang pandapatan randa bukang cuma soal angka, mar juga akang jadi tanda tata kelola pasar yang gagal.
“Ini bukang soal angka yang seng war, ini soal komitmen dan kamampuan katong dalang kelola aset daerah. Pasar Mardika ini potensi basar, mar kanapa seng bisa biking akang maksimal?” ujar Benhur di Ambon, Rabu (26/11/2025).
Menurut Benhur, pandapatan yang randa ini tagal pasar ini dong kelola tarbae. Sistem retribusi seng efektif, kabarsihan seng tajaga, dan kaamanan yang seng cukup-cukup biking pedagang pamalas bajual dalang pasar. Pedagang banya lebe pilih bajual di pinggir jalang.
“Pengelola pasar musti lebe kreatif dan inovatif par tarek padagang deng pambeli,” tegasnya.
DPRD Maluku su tau kondisi pasar model bagitu, trus mulai buka opsi kase Pasar Mardika par Pemkot Ambon. Benhur nilai Pemkot pung sumber daya dan perangkat yang lebe lengkap, mulai dar Satpol PP, Dinas Perhubungan, sampe Dinas Kebersihan, par tata pasar lebe bae.
Opsi par kase ka Pemkot Ambon ini biking orang bisa tanya-tanya, batul itu solusi? Ato memang itu tanda Pemprov Maluku gagal?
“Ada yang bilang, kase Pasar Mardika ka Pemkot cuma par kas pindah masalah dar tangang satu ka tangang laeng, deng sondor jaminan par biking bae,” ujar Benhur.
Kalo Pemkot Ambon ambe akang, tantangan jua seng haringang. Salaeng tata kelola yang kronis, ada masalah sosial macang padagang kaki lima, pungutan liar, deng praktik ilegal laeng. Pemkot jua parlu pung visi jalas par biking Pasar Mardika jadi pusat perdagangan modern dan pung daya saing.
Benhur desak Pemerentah Provinsi lakas evaluasi basar soal Pasar Mardika. Evaluasi musti kas iko samua pihak, macang padagang, pengelola pasar, deng masyarakat, par bisa susung rancana aksi konkret deng taukur.
“Katong su seng bisa tunda lae. Pasar Mardika ini katong pung aset, katong pung potensi. Musti lakas bagara par salamatkan akang,” pungkas Benhur.
Nasib Pasar Mardika sakarang ada di simpang jalang. DPRD deng warga Maluku harap pasar ini bisa kumbali jadi kabanggaan dan sumber pendapatan nyata par daerah. (Leo)
