AmbonVibes.com – Polisi jua manusia yang punya rasa. Mar baju deng capatu tetap sa rasa resmi-resmi. Tagal Polri memang lembaga formal. Bahasa tulisan di dokumen Polri, juga formal dan teknis.
Hari ini, Senin (17/11), Redaksi AmbonVibes.com ada dapa baca rilis dar Polda Maluku. Rilis ini laeng dar laeng. Memang akang cuma susunan huruf, kata, kalimat, mar kali ini huruf hidup deng huruf mati samua takumpul jadi vokal. Rasa akang paleng hidop, dan ada buka mulu bataria, kas kaluar isi hati.
Teks rilis itu pung judul, “Jeritan Anak Maluku: Tolong Kami…Selamatkan Masa Depan Kami”. Bukang maeng-maeng, yang tulis deng hati balisa itu Kaur Penmas Bidhumas Polda Maluku AKP Imelda Haurissa. Anana Maluku musti hati sanang deng bangga, ada satu Mama Polwan yang paleng sayang anana.
“Suara anak-anak Maluku hari ini, bukan lagi hanya sekadar tangis kecil di sudut-sudut rumah atau jeritan tanpa arah di tengah hiruk-pikuk kehidupan. Suara itu kini menjadi seruan lantang, menyayat hati siapapun yang mendengarnya: ‘Tolong Kami…Selamatkan Masa Depan Kami,'” ini akang alinea partama tulisan AKBP Imelda Haurissa.
Angka kakarasang par ana di Maluku dalam satu dua taong balakang ini tarus nae biking hati iko nae-nae. Akang pung model lai macang-macang, dar kakarasang fisik, psikis, seksual, sampe kas talamberang ana. Samua ini jadi tanda, perlindungan anana di sini paleng loga-loga.
AKP Haurissa bilang, anana banyak hidop di tampa yang musti aman deng pono cinta kasih, mar justru dong dapa luka paleng kadalang,bae lupa yang kantara, bae luka yang tasambunyi. Trauma, katakotang, rasa ceria ilang, samua su jadi kenyataan paleng pahit par anana yang mustinya batumbu bebas deng bahagia.
“Kalo sorang ana bilang ‘Beta takut pulang’ ato ‘Jangan kase tinggal beta’, itu bukang cuma keluhan. Itu dong su bataria yang kalo iko batul, haros biking katong tabangong,” tegasnya.
Menurut Haurissa, perlindungan anana itu tugas samua pihak: orang tua, negara, pemda, aparat penegak hukum, lembaga sosial, tokoh agama, tokoh adat, bahkan orang birman deka-deka rumah. Setiap kakarasang bukang hanya melukai keluarga, mar juga coreng Maluku pung dalang muka.
Maski aparat dan pemerentah tarus biking kuat sistem parlindungan anana, deng ambe tindakan par pelaku kakarasang, samua itu seng bisa maksimal kalo masyarakat sondor barani iko kalesang an basuara.
“Sikap badiang ato pembiaran, itu juga bentuk kakarasang,” tegas AKP Haurissa.
Mama Polwan ini bale ajak samua bayangkan kalo anana bisa bicara terus trang sondor takotang apapa. Mangkali dong pung isi hati akang sesederhana bagini:
“Katong cuma mo rasa aman. Katong mo skolah, bukang dapa pukol. Katong mo barmaeng, bukan dapa kuras. Katong mo orang dewasa jaga katong”.
Pasang-pasang macang itu musti cukup par toki hati, ubah cara bafikir, deng dorong par lahir kebijakan yang banar-banar batimbang par anana.
Kalo Maluku mo tumbuh jadi daerah yang dame deng pono harapan, akang pung fondasi mulai dar hari ini: Lindungi anana.
AKP Haurissa ada tambah lai, setiap kasus kakarasang akang jadi tanda bahwa sistem parlindungan masih bocor. Mar setiap anana yang berhasil dapa tolong, itu harapan baru par Maluku pung hari eso.
“Dengar dong, lindung dong. Badiri deng dong. Har eso Maluku bukang katong pung. Har eso itu dong pung, dan dong sio-sio par katong oras ini,” tutupnya. (Keket)
