AmbonVibes.com – Warga Batumerah Ambon Nurlina Alimudin seng parnah tabayang. Niat mo tolong orang yang pung motor mogok, akhirnya biking dia tamaso di parkara yang tahela sampe sataong lebe.
Waktu itu, Selasa (18/06/24) deka dia pung rumah di Galunggung, Nurlina dapa lia dua orang yang pung motor mogok. Dong bensin karing.
Deng dia pung sepeda motor, Nurlina pi sabalah jalang deka dong dua. Biar seng kanal, mar Nurlina cabu kepeng par dong dua bisa bali minya.
Mar kage lae, laki-laki satu nama RM laju-laju deng motor dari arah atas di sebelah kanan, sedangkkan Nurlina di sebelah kiri. RM ini langsung tabrak tiga motor di pinggir jalang. Salah satunya Nurlina.
Nurlina sampe jatuh tabanting ke bageang tengah jalang. Dia langsung dapa bawa ka Ruma Saki Bhayangkara.
“Jadi beta dapa tabrak dari muka, waktu beta ada stop par bantu orang mogok itu. Sedangkan RM itu dia su mabo,” kata Nurlina.
Waktu di ruma saki, RM pung Om datang bicara deng Nurlina. Katanya, tolong jang proses akang RM tagal dia ana yatim. Nurlina deng dia pung laki bale rasa kasiang, dan rencana par ator bae-bae.
Satu bulan abis tabrakan, pas 18 Juli 2024, Polantas di Pos 800 depan Hotel Santika kas bakudapa Nurlina dengan RM.
Ada dudu par bicara baku ator bae-bae, RM pung Om nama UU maso dalang pos. UU ini anggota Ditreskrimum Polda Maluku. Dia langsung marah-marah.
“Dia bentak beta. Dia bilang, Ose diam. Balong tantu ponakan beta pelaku. Bisa saja ose yang pelaku,” bagitu UU suara basar.
Polantas di Pos 800 nama Al badiri lalu bawa UU kalur, deng kas bicara.
“Ini katong ada mediasi,” kata Al kepada UU.
Dapa bilang bagitu, UU tetap seng ambe bae.
“Seng pake mediasi-mediasi,” kata UU.
UU juga langsung paksa kas kaluar RM pung motor dari Pos 800. UU bilang ka Polantas Al, kase kaluar motor saja
“Kase kaluar motor. Besok beta bawa motor ka Polres. Nanti proses di Polres saja,” kata UU.
Karena dapa bilang begitu, Polantas Al akhirnya kase motor. RM dan UU langsung baku gonceng pi kastinggal Pos 800. Nurlina dapa bilang dari Polantas, nanti urusan di Polres Perigi Lima saja.
Nurlina masih usaha par bicara bae-bae deng UU, tetapi UU seng mo mediasi. Lalu, Nurlina jua dapa tau, RM pung motor yang .
jadi barang bukti, dong su jual akang.
“Jadi bukang beta pung motor yang dong jual, macang di berita Ambon Vibes. Dong jual itu RM pung motor, padahal itu barang bukti. Sedangkan motor beta su dapa tahang, masih ada di Polres sataong lebe ini,” ungkap Nurlina.
Parkara ini takancing di Polres tagal seng ada barang bukti, yaitu RM pung motor. Nurlina dapa tau, motor itu dong su jual ke Anugerah Motor.
Tagal itu, Nurlina pi ka Subbid Wabprof Bidpropam Polda Maluku. Tunggu punya tunggu, Nurlina rasa dia pung kasus seng maju-maju.
Nurlina dapa arahan dari Sentra Pelayanan Kepolisian Terpadu (SPKT) Polda Maluku par bawa dia pung masalah ke Krimum.
Di Krimum, BAP su biking. Mar sakarang Nurlina rasa kecewa tagal su ampa bulan lebe, akang seng maju-maju. Saksi-saksi yang ada di BAP jua, balong dapa pangge.
Nurlina taruh harap par Polda Maluku, minta dia pung masalah bisa capat abis.
“Beta minta keadilan agar oknum polisi UU dapa proses seadil-adilnya. Juga penyidik yang tangani kasus ini bisa lebe profesional, jang barat sabalah, jang ada kongkalikong,” harap Nurlina.
RALAT: Berita Ambon Vibes judul “Kapolda Maluku Tolong Jua, Oknum Polisi Jual Motor Beta” dapa koreksi dar Nurlina Alimudin. Menurut Nurlina, bukan dia pung motor yang dapa jual, mar barang bukti yang dapa jual, yaitu RM pung motor. Sedangkan Nurlina pung motor ada masih dapa tahang di Polresta Ambon Lease. Deng ini, redaksi su biking batul berita yang kaliru/salah. Minta maaf banya-banya par samua yang rasa seng nyaman. Danke banya
