Tata Boni dudu-dudu di tapalang. Kofi deng sukung goreng su tadudu dar tadi. Mar paitua rupa seng kore akang. Kofi mulai dinging lalu samut satu dua ekor mulai mangente di pinggir mangko.
Mata Tata Boni tatanang di layar. Testa su lia takoro rupa aer masing dapa tiop dar anging timur.
“Tikus mondo sakali ni jua,” teriak Tata Boni basar-basar.
Birman kiri-kanang sampe dapa dengar. Memi angka Kapala dar foris sabala, cuma kata mo tau Tata Boni stori apa.
Mima di sabalah jua biking leher tapanjang-panjang mo tau kata Tata Boni bacarita deng sapa.
“Tikus mondo dong ni, mo capat kaya kapa?” Suara Tata Boni nae kumbali.
Kali ini Uwa Ina muncul dar dalang rumah. Uwa su hafal Tata pung kalakuang. Kalo su stori sasandiri, pasti ada hubungan deng berita di media.
“Tata e, tikus mondo apa yang su jadi berita kumbali? Coba baca akang dolo,” kata Uwa Ina lalu dudu di sabalah.
Memi deng Mima muncul dar kiri kanang. Pas sudah, ampa orang su kumpul, pasti rame soalnya dong bisa stori dari pagi sampe matahari maso.
“Palang deng tikus mondo. Dudu sandiri dar tadi, samut su panjat mangko. Skang samut beranang dalang kofi,” ujar Mima.
Tata Boni sondor master deng samut. Paitua tetap seng lapas dari layar hape.
“Ternyata, oh ternyata…..!” Tata taruh hape di atas tapalang, lalu loku mangko, minong Kofi.
Memi, Mima, deng Uwa Ina nganga Tata satu nafas. Dong tunggu kata Tata mo bilang apa.
“Ternyata apa, Tata?” Tanya Uwa Ina.
Tata Boni nganga dong tiga. Paitua tarek nafas dalang-dalang.
“Dong bilang kata Maluku ini orang miskin banya. Lima blas persen,” Tata su mulai.
“Kantor Statistik bilang bagitu, Tata,” balas Mima.
“Orang miskin ada banya yo, tikus mondo ada banya lai. Heran!” Ujar Tata Boni.
“Tikus mondo tuh sapa lai? Tata kalo bicara jang pake kata-kata babumbu boleh. Beta ilang jalang!” Memi protes.
“Dapa tau, jam pelajaran bahasa Deng sastra waktu iskola, ternyata Ale lari skola. Makanya seng tau kiasan-kiasan,” Tata Boni sikat.
“Ao, Tata bilang Dolo. Tikus mondo apa?” Mima Iko bingong.
Tata kumbali loku hape lalu ketik di google: “Korupsi dana ADD Maluku”. Begitu google buka samua, Tata kas unjuk satu demi satu.
Tata bilang, korupsi dana desa su sampe di samua kabupaten deng kota di Maluku. Ada yang pancuri sandiri, ada yang pancuri deng tamang-tamang perangkat desa.
“Kepala desa, kepala ohoi, raja, dong itu pemimpin di negeri-negeri. Dong itu ada pung wibawa. Mar tagal dana ADD pung tahela, dong pung wibawa ilang. Dong jatuh di bawah pohon cili,” Tata ure akang.
Uwa Ina su seng tahang. Uwa rasa, Tata talalu paleu. Bilang tikus mondo, kage lae orang miskin, abis itu bilang dana ADD.”
“Beta bale bodo akang Tata ni,” kata.Uwa.
“Beta lai… ” Mima batamba.
Tata loku mangko lalu talang kofi. Mar seng barapa lama, Tata sumbur kopi kaluar macang orang mabo sageru.
“Cukardeleng seh. Beta talang samut tiga ekor kapa?” Tata pegang leher bingong abis tatigo.
Mima deng Memi tahang katawa pake tutu mulu deng tangang.
“Ini samut balajar jadi tikus mondo. Akhirnya tacolo dalang kofi ka seng?” Tata marah semut.
“Tikus mondo kumbali,” kata Uwa lalu badiri pi ambe aer putih.
Tata Boni minong aer. Laklaki ambe sukong, lalu kunya-kunya akang.
“Dari hasil lur-lur google, dapa tau di Maluku, samua kabupaten deng kota su seng batul. Tikus mondo kuliling,” Tata angka bicara.
“Tikus mondo tu bagemana, Tata?” Memi panasaran.
“Hahae anana skarang sondor tau tikus mondo. Cueee. Huraaa!” Tata baterek.
Tata kasiang lia Memi deng Mima. Juga Uwa Ina. Dar itu, Tata mulai trus tarang.
“Perangkat desa, negeri, ohoi, yang makang kepeng desa, itulah tikus mondo. Tikus mondo dar kampung,” Tata bilang.deng sumangat.
“Oooo, bagitu?” Memi, Mima, Deng Uwa Ina su macang vokal grup saja. (Manu Tura Meten)
