AmbonVibes.com — Parkara oknum brimob yang borbaru maeng seks paksa par nona 16 taong di Ambon, akang pung ekor-ekor banya.
Oknum anggota Brimob Polda Maluku, dia nama Bripka RN memang su dapa loku dan musti iko proses hukum. Mar di luar itu, korban ternyata ada dapa teror.
Kajadiang Dalang Kios
Perkara maeng seks paksa ini akang kamuka mulai waktu korban dapa pangge dar RN yang su bobou minuman karas. Dia ajak korban maso kios. Kios itu, RN yang punya. Nah, dalang kios itu sudah, samua terjadi.
Tagal seng tarima dapa paksa maeng seks, korban akhirnya barani lapor polisi. Waktu parkara ini su dapa urus di Polda Maluku, korban malah dapa biking dari keluarga oknum brimob RN. Dong paksa dia cabu laporan.
Korban mangaku dapa jemput dar anggota Brimob lalu dapa bawa ka Asrama Batalyon. Di sana, dong buju-buju pake uang. Juga ada surat pake meterai yang su ada komandan tekeng akang.
Oknum brimob pung bini nama GP deng dia pung mama nama WS, juga pi di korban pung rumah lalu maeng ancam.
“Dong bilang beta seng berhak lapor tagal su dapa bayar. Dia pung bini sampe gartak mo pukul Beta,” tutur korban deng gemetar.
Korban Dapa Pendamping
Pendamping korban dari UPTD PPA Kota Ambon Nini Kusniati kase pasti, korban sakarang dalam pendampingan intensif deng perlindungan lembaga resmi.
“Katong desak penanganan kasus ini bajalang secara profesional deng seng boleh ada tekanan par korban. Ini soal martabat parempuang deng kepercayaan publik ka penegakan hukum,” tegas Nini.
Polisi Pastikan Proses Hukum Transparan
Kabid Humas Polda Maluku Kombes Pol. Rositah Umasugi, S.I.K. bilang, parkara ini dong tangani deng profesional sondor ada intervensi.
“Oknum yang terlibat su dapa pariksa intensif. Proses hukum dan etik sedang bajalang di Bidpropam dan Ditreskrimum. Katong pastikan seng ada toleransi par anggota Polri yang biking kekerasan par anana,” jelasnya.
Rositah juga minta publik seng parlu sebar informasi yang bisa ungkap identitas korban.
“Korban dapa perlindungan iko Undang-Undang Perlindungan Anak. Mari katong dukung proses hukum ini deng bae,” pungkasnya. (Tim)
