AmbonVibes.com – Katua Komisi III DPRD Provinsi Maluku Alhidayat Wajo meminta Pemerentah Provinsi (Pemprov) Maluku lebe bae fokus kelesang kinerja BUMD yang su ada, darpada biking badang usaha baru, yang bisa tamba beban kauangan daerah.
Alhidayat manilai, langkah yang lebe mandesak oras ini adalah kalesang par biking bae kinerja BUMD yang pemerentah daerah su punya, sahingga mampu kase kontribusi nyata par pandapatan deng parekonomian Maluku.
“Kalo biking BUMD baru, tantu mustu ada panyartaan modal dar pemerentah. samantara katong pung kondisi APBD masih hosa-hosa,” kata Alhidayat, saat dapa kontak dar Ambon, Rabu (12/8/2026).
Manurut dia, pandirian parusahaan daerah baru seng cuma takait deng pambantukan kalambagaan, mar parlu sadia kepeng yang tarus dar pemerentah daerah.
Tagal itu, Alhidayat bilang satiap rencana kas badiri BUMD musti lebe dolo lia-lia daerah pung kepeng mampu ka seng, deng lia prospek bisnis yang mo kas bajalang akang.
Dia kas contoh, PD Panca Karya masih bisa biking kuat akang par lebe bisa bawa rol sabage daerah pung parusahaan.
“Yang paleng panting sakarag, bagemana katong biking optimal BUMD yang su ada. Jang sampe kas badiri baru mar yang su ada akang seng maksimal,” ujar Alhidayat.
Dia kastau, dalag rapat Badang Anggaran (Banggar) DPRD Provinsi Maluku, komisi su bilang deng tegas par rancana pambantukan lima BUMD lebe bae pikir-pikir lai dolo.
Dar lima BUMD yang ma kas badiri itu, kata dia, baru dua sektor yang dapa satuju par kas tarus ka Kamenterian Dalang Negeri (Kemendagri), yakni sektor parikanan demh energi dan partambangan.
Maski bagitu, Alhidayat bilang, parsetujuan par usul dua sektor itu seng bararti DPRD langsung satuju biking parusahaan baru, sondor kaji lebe lanjut.
Manurut dia, pemerentah daerah parlu kaji manyaluruh, tarutama manyangkut model bisnis, kabutuhan modal, prospek usaha, sampe kamungkinan integrasi bidang usaha ka dalang BUMD yang su tasadia.
“Komisi III tetap minta par kaji ulang bae-bae. Katong musti lioa dolo akang pung model bisnis, ruang lingkup usaha, lalu kamampuan daerah, par kase panyartaan modal,” jelas dia.
Alhidayat manilai, sektor parikanan mopun energi deng partambangan pung potensi basar par kas jalang di Maluku. Mar akang potensi seng otomatis jadi alasan par kas badiri badang usaha baru, kalo boisa dapa kalola malalui parusahaan daerah yang su ada.
“Kalo sektor parikanan ato energi deng partambangan masih bisa kas integrasi ato kas kuat malalui BUMD yang su ada macang Panca Karya, par apa katong biking parusahaan baru?,” tegas Alhidayat.
Dia harap Pemprov Maluku lebe konsolidasi dan panguatan BUMD yang ada, par parusahaan daerah batul-batul sehat sacara bisnis, deng mampu kase manfaat par daerah.
“Jang sampe katong tambah parusahaan, mar laste-laste pemerentah juga yang musti tarus suntik modal. Yang katong parlu itu BUMD yang sehat, produktif deng bisa kase kontribusi par daerah,” tandas Alhidayat. (Red/Merindu)
