AmbonVibes.com – Anggota DPRD Provinsi Maluku Anos Yeremias minta publik seng taburu-buru bapikir kalo Dana Alokasi Umum (DAU) Taong Anggaran 2026 yang Pemerentah Provinsi Maluku sondor dapa tambahan sabage kagagalan Tim Anggaran Pemerintah Daerah (TAPD).
Manurut Anos, setelah lia-lia Kaputusan Menteri Kauangan (KMK) Nomor 198 Taong 2026, ada fakta kalo akang kondisi juga sama deng di sajumlah pemerentah provinsi laeng.
“Dalang akang dokumen, bukang cuma Pemerentah Provinsi Maluku yang dapa nihil Tambahan DAU Taong Anggaran 2026.
Pemerentah Provinsi Nusa Tenggara Timur dan Pemerentah Provinsi Maluku Utara juga sama-sama seng dapa,” kata Anos dalang katarangang, Jumat (14/8/2026).
Dia manilai, akang informasi ini parlu paskali samua warga mangarti bae-bae par pambahasan manganai kabijakan fiskal pemerentah pusat tetap pake akang data, bukang asumsi.
Anos bilang masih banya pihak yang campor aduk antara Tambahan DAU Taong Anggaran 2026 deng panyaluran kurang bayar sampe Taong Anggaran 2024.
Manurut dia, kadua komponen marupakan pos yang beda.
Dia kastau, Pemerentah Provinsi Nusa Tenggara Timur memang tarima sakitar Rp17,415 miliar, mar akang kepeng barasal dar komponen panyaluran kurang bayar, bukang Tambahan DAU 2026.
Hal sarupa juga tarjadi par Pemerentah Provinsi Maluku Utara yang ada tarima sakitar Rp61,584 miliar, deng Pemerentah Provinsi Maluku yang dapa sakitar Rp8,160 miliar, yang juga barasal dar komponen panyaluran kurang bayar.
“Karena itu, seng batul kalo akang angka-angka dapa anggap sabage Tambahan DAU Taong Anggaran 2026,” ujar dia.
Di sisi laeng, Anos manyoroti fakta kalo saluruh pemerentah kabupaten deng kota di Provinsi Maluku justru dapa alokasi Tambahan DAU 2026.
Manurut dia, total tambahan yang 11 kabupaten/kota di Maluku tarima akang sakitar Rp577,88 miliar.
Fakta itu, kata dia, manunjukkan parsoalan alokasi Tambahan DAU seng sederhana yang saparuh orang mangarti akang, saolah-olah pemerentah pusat kurang lia-lia Provinsi Maluku.
Maski bagitu, Anos manilai Pemerentah Provinsi Maluku tetap parlu kase panjalasan par DPRD tarkait alasan seng dapa Tambahan DAU Taong Anggaran 2026.
Dia minta TAPD kastau formula mopun variabel yang pemerentah pusat pake par ator akang kepeng.
Manurut Anos, aspek yang parlu buka akang menyangkut kondisi fiskal daerah, kabutuhan balanja pagawe, tarmasuk panggajian ASN deng PPPK, juga data yang jadi dasar psrhitungan pemerentah pusat.
“Pertanyaan yang lebe tepat adalah apa formula deng kriteria yang pemerentah pusat pake sampe Pemprov Maluku, Pemprov NTT, deng Pemprov Maluku Utara sama-sama seng dapa Tambahan DAU, samantara banya pemerentah kabupaten/kota justru dap akang,” kata Anos.
Dia bilang deng tegas, fungsi pangawasan DPRD tarhadap pemerentah daerah musti tetap bajalang mar kritik ka pemerentah juga musti pada fakta dan data yang bisa par tanggong jawab akang.
“Kritik itu parlu. Pangawasan musti tetap bajalang mar kasimpulan juga musti pake data,” tegas Anos.
Dia harap, ada transparansi pemerentah daerah manganai faktor-faktor yang bawa pangaruh par kabijakan pemerentah pusat sahingga masyarakat bisa paham bae-bae panyabab Tambahan DAU par Pemerintah Provinsi Maluku Taong Anggaran 2026 akang sondor ada alias nihil. Keket)
