AmbonVibes.com — Katua Komisi III DPRD Provinsi Maluku Alhidayat Wajo bilang, parsoalan pandapatan asli daerah (PAD) bukang samata-mata tagal target seng dapa, malaengkang takait deng pola karja pemerentah daerah yang balong adaptif tarhadap kondisi geografis deng kabutuhan masyarakat.
Manurut Alhidayat, inovasi yang minim deng pandekatan aktif dalang manjangkau potensi pandapatan manjadi salah satu faktor utama pangelolaan PAD di Maluku balong optimal. Dia manilai karakter wilayah kapulauan yang loas balong baku tamakang deng strategi palayanan yang tepat deng responsif.
“Parsoalan katong bukang sakadar target yang seng dapa mar bagemana sistem deng layanan yang ada oras ini balong mampu manjangkau saluruh lapisan masyarakat sacara marata, tarutama par dong yang tinggal di wilayah kapulauan deng tarluar,” ujar Alhidayat par wartawan di Ambon, Senen (27/4/2026).
Alhidayat sorot salah satu parsoalan mandasar, yakni sistem pambayaran pajak kandaraan barmotor yang masih susah par masyarakat di daerah tarpancil mo akses akang. Banya wajib pajak musti bajalang jao deng biaya banya kaluar, cuma par dong pung kawajiban.
Kondisi ini, lanjut Alhidayat, justru jadi beban tambahan par masyarakat, bahkan dalang babarapa kasus, ongkos jalang bisa lebe basar dar pajak yang musti dong bayar.
“Kalo warga yang tinggal di pulau-pulau musti kas kaluar kepeng transport deng akomodasi yang lebe basar dar pajak, wajar kalo dong tunda ato seng bayar,” tegas Alhidayat.
Sabage solusi, dia mandorong parobahan pola karja seluruh Organisasi Perangkat Daerah (OPD) par jang pasif di tampa. Dia bilang, pandekatan proaktif malalui layanan bagara ato sistem “jemput bola” ka wilayah kecamatan, desa, dan pulo-pulo kacil.
“Jang lai katong tunggu masyarakat datang. Pemerentah su musti turung langsung buka titik layanan sampe ka palosok, sahingga masyarakat seng parlu susah-susah lai,” ujar Alhidayat.
Salaeng itu, dia juga harap pake teknologi informasi dalang sistem pamungutan pajak par lebe efisien deng jangkau layanan. Menurut dia, implementasi digitalisasi musti lia kondisi infrastruktur di lapangan.
“Digitalisasi itu solusi, mar harus realistis. Jang sampe katong bicara teknologi canggih, samantara jaringan komunikasi di daerah belong sampe,” kata Alhidayat.
Di sisi laeng, dia kas inga, pangalolaan kauangan daerah musti tatap barlandaskan prinsip efisiensi, transparansi, dan akuntabilitas. Dia bilang, panting paskali evaluasi kinerja yang seng cuma fokus di angka, mar juga efektivitas kabijakan di lapangan.
“Evaluasi musti biking manyaluruh, pastikan satiap program bajalang efektif deng banar-banar kase manfaat par masyarakat,” tandas Alhidayat.
Dia harap, eso-eso pemerentah daerah lebe responsif dalang identifikasi potensi pandapatan sakaligus sadia kabijakan yang solutif, sahingga PAD bisa nae sacara barkalanjutan deng bardampak langsung par kasqjahteraan masyarakat. (red/merindu)
