AmbonVibes.com – Komunitas balayar, Ambon Sailing Community (ASC) tarus-tarus karja sama deng barbage pihak di Australia. Kali ini, Katua ASC Nico Tulalessy ada pi ka Negara Bagian Victoria, par lia-lia kans karjasama di sana.
Kali ini di Melbourne, Nico Tulalessy baku dapa Konjen Republik Indonesia Johanes Djatmiko H. Prasetyo dan Konsul Sosial Budaya Silvany A. Pasaribu. Nico seng sandiri, malaengkang ada bajalang sama-sama deng salah satu aktivis pendidikan di Maluku, Simon Matakupang.
Konjen tarima Nico deng Simon di Melbourne, Kamis (2/4). Kasampatang ini Nico pake par sampekan barbage hal yang ASC mo karja akang par kas lengket hubungan Maluku deng Negara Bagian Victoria lebe khusus Kota Melbourne.
Dari Melbourne, Nico kastau par AmbonVibes.com, Jumat (3/4) malang ini, hubungan karja sama itu antara laeng di dunya pendidikan deng pariwisata. Dunya pendidikan barupa karja sama antarkampus macang yang su tajaleng deng Fakultas Musik Univeritas Melbourne. Sadangkan di bidang pariwisata, karja sama par biking warga Melbourne mo datang wisata ka Maluku.
Salaeng pendidikan deng pariwisata, Konjen deng ASC bahasa bidang kebudayaan barupa culture exchange antara Maluku deng Victoria. Bahkan kadua pihak juga asprak manganae peluang anana Maluku bisa karja di Australia.
Manurut Nico, pertemuan juga bahas peluang par paningkatan kapasitas, deng peluang hubungan business to business (B to B) deng Government to Government (G to G).
Pertemuan juga bahas peluang anana muda dar Kota/ kabupaten di Maluku bisa biking apa-apa deng dong dar kota-kota di Victoria.
Nico Tulalessy yang juga alumni Australia Award ada minta par ada paluang par UMKM bisa iko Event Trade par cari paluang pasar par dong, salaeng ansprak juga manganae program par panyandang disabilitas di Maluku.
LOMBA LAYAR DARWIN-BANDA
Nico juga kastau Event lomba layar Darwin-Banda Yacht Race bulang Agustus 2026 eso-eso, karja sama Dinah Beach Darwin deng ASC, TNI AL Kodaeral IX Ambon, Dispar Provinsi Maluiu dan Kabupaten Malteng.
Pada kasempatan yang sama, Simon Matakupang carita aktivitas biking siap anana di Ambon par dong pung har edo. Dia kastau ada biking siap anana di Kota Ambon dar kacupeng usia SD par iko les Bahasa Inggris. Deng bagitu, eso-eso anana ini bisa basaing dapa beasiswa ka luar negeri.
Konjen RI Johanes Djatmiko paleng sanang deng akang partemuan. Dia mangaku siap dukung apa yang su ASC biking mopun yang mo biking deng Melbourne.
Secara khusus par untuk lomba Layar Darwin-Banda, KJRI siap bantu promosi ka palayar-palayar di Victoria.
Konjen sambut bae panjajakan karja sama deng Fakultas Musik Melbourne University dan nanti mo kase informasi takait event budaya moupun pardagangan yang bisa orang-orang Maluku iko akang.
Konjen bilang mo bantu kase informasi yang tepat takait peluang visa liburan sambil bakerja par mahasiswa, tarutama takait parsyaratan yang musti iko akang, deng atorang yg musti mangarti akang, par jang dapa susah eso-eso.
Konsul Silvany A. Pasaribu juga deng hati sanang bilang dia sadia bantu ASC dalam lobi karja sama pendidikan dan sosial budaya di Melbourne. (Opa)
