AmbonVibes.com – Wakil Katua DPRD Provinsi Maluku Johan Johanis Lewerissa taruh parhatian tarhadap katarbatasan sarana malaut par nelayan Dusun Seri, Negeri Urimessing, Kecamatan Nusaniwe, Kota Ambon.
“Kabutuhan masin parau deng jareng mo jadi bageang dar aspirasi yang katong mo parjuangkan ka pemerentah,” tegas Johan, waktu dapa kontak dari Ambon, Rabu (9/9/2026).
Johan bilang, nalayan di Dusung Seri pung sarana produksi masih tarbatas, jadi parlu dapa parhatian tagal sabageang basar masyarakat pung pandapatan dar sektor parikanan.
“Warga sampekan dong pung aspirasi waktu Beta biking kagiatan reses masa sidang III taong 2026 di Dusung Seri, Minggu (6/9/2026) kamareng,” kata Johan.
Dalang acara baku itu, warga sampekan, parau nelayan banya yang su seng pake lai tagal masin su rusak. Akang biking sampe nalayan saparu pi bagabung deng nelayan laeng par bisa sama-sama ka lao pake satu prau.
Deng mudel bagitu, manurut Johan, pandapatan nalayan seng talalu banya tagal musti baku bage hasil par banya orang.
Salaeng masing, warga juga parlu jareng deng barbage parlangkapan panangkapan ikang yang laeng. Johan bilang, katarbatasan sarana produksi seng boleh jadi hambatan par masyarakat, par dong bisa tarus mancari.
“Paluang par dapa bantuan masih tabuka lebar, bae malalui program pemerentah provinsi mopun karja sama deng pemerentah kota,” ucap Johan.
Dia bilang, bantuk dukungan pemerentah seng fokus cuma di badan prau mar juga masin, jareng, deng parlangkapan laeng, par dong bisa turung tangka ikang di lao.
“Bantuan seng cuma par badang prau sa, mar juga masing, jareng, deng parlangkapan laeng yang dekeng dong pung mata pencaharian,” tegas dia.
Johan bilang, paluang dapa bantuan tetap tabuka seaama masyarakat masih tarus deng aktivitas sabage nalayan, deng pung komitmen par tarus barusaha.
“Salama masih tarus deng profesi nalayan deng mo tarus barusaha, hak dan kasampatan ini tetap ada,” sebut dia.
Johan juga mancatat kaluhan warga, tarkait kondisi jalang yang balong dapa aspal maski proses pambebasan lahan su lama paskali.
Parsoalan panarangan jalang saring dapa gangguan juga jadi parhatian, tagal barkaitan langsung deng kasslamatan pangguna jalang.
Manurut Johan, katarbatasan anggaran manjadi salah satu ksndala pemerentah, dalang mamanuhi saluruh kabutuhan pambangunan.
Oras ini, kamampuan anggaran pambangunan baru ada di kisaran 20 sampe 30 parsen, dibandingkan kebutuhan yang ada.
“Kalo kabutuhan pambangunan sangat basar, samantara kamampuan anggaran tarbatas, maka musti ada skala prioritas. Aspirasi masyarakat tetap katong catat deng parjuangkang akang,” jelas Johan.
Dia manilai, parsoalan panarangang jalang juga seng boleh dapa abai tagal kondisi jalang yang galap pung potensi maningkatkan risiko kacalakaan.
“Kalo lampu jalang saring mati, tantu paleng bahaya par masyarakat. Ini bakaitan deng kasalamatan, deng musti dapa parhatian,” kata Johan.
Johan pastikan, saluruh aspirasi yang masyarakat Dusun Seri sampekan, akang jadi bageang parjuangan DPRD par mo koordinasi deng pemerentah sasuai kawenangan, deng kamampuan anggaran.
“Saluruh kaluhan ini su katong catat. Katong mo tarus kawal akang deng parjuangkan par masyarakat pung Bae,” tandas Johan. (Red/Merindu)
