AmbonVibes.com – Sentral Organisasi Karyawan Swadiri Indonesia (SOKSI) biking aksi sosial kaagamaan. Deng samangat bulang suci Ramadan, Dewan Pimpinan Daerah (Depidar) SOKSI Provinsi Maluku bage-bage santunan par anana santri yatim deng dhuafa di Pondok Pesantren Hidayatullah Liang, Kabupaten Maluku Tengah, Sabtu (14/3/2026).
Kagiatan ini bajalang satu rangke deng buka puasa barsama. Katua Depidar SOKSI Maluku Rohalim Boy Sangadji datang deng jajaran pangurus bagabung deng pangalola Pondok Pesantren Hidayatullah Liang.
Dalang sambutan, Boy Sangadji bilang, Ramadan bukang cuma par tahang-tahang lapar dan aus, mar juga jadi momentum par kas kuat kapadulian deng solidaritas tarhadap sasama, tarutama par anana yatim deng kaum dhuafa.
“Ramadan su ajar katong par lebe paduli deng barbage bantuan par sadiki kas ringang kabutuhan para santri deng mandukung aktivitas pendidikan di Pondok Pesantren Hidayatullah Liang,” ujar Boy Sangadji.
Kagiatang ini dapa isi deng doa barsama par Presiden Republik Indonesia Prabowo Subianto dan Menteri Energi dan Sumber Daya Mineral (ESDM) Bahlil Lahadalia par sanantiasa dapa kesehatan, umor panjang, deng kakuatan dalang manjalankan amanah pimpin bangsa.
Boy Sangadji paleng harap, doa yang kas nae barsama para santri deng masyarakat, akang jadi kakuatan spiritual par para pamimpin bangsa dalang manjalankan tugas nagara.
“Samoga kagiatang yang katong biking ini marupakan panggilan dari Allah SWT. Katong sama-sama sumbayang par Bapak Presiden Prabowo Subianto dan Menteri ESDM yang juga Katua Umum DPP Partai Golkar, Bapak Bahlil Lahadalia, salalu dapa kase kesehatan, kakuatan, dan umor panjang dalang manjalankan tugas nagara par kamajuan deng kasajahteraan rakyat Indonesia,” kata Boy Sangadji.
Dia tegaskan, kahadiran dia deng jajaran SOKSI Maluku dalang kagiatan itu marupakan bantuk panggilan hati par barbage deng sesama di Bulan Ramadan.
“Beta musti datang deng tamang-tamang. Bagi beta, ini adalah panggilan Allah SWT par bisa hadir har ini, silaturahmi deng barbagi zakat di bulang Ramadan. Walaupun seng sabarapa, mar katong bisa barbage,” ungkap Boy.
Abis dapa dengar langsung kondisi dan katarbatasan di Pondok Pesantren Hidayatullah Liang, Boy Sangadji bilang mo tarus kase parhatian dan dukungan tarhadap kagiatan pendidikan di akang pasantren.
“Insya Allah eso-eso beta seng janji, mar satiap kali beta ka Ambon, beta akan barusaha sempatkan waktu barkunjung ka sini. Beta juga siap jadi bageang dar sudara-sudara di sini. Beta dengar panjelasan ustaz takait kondisi pasantren, dan insya Allah katong mo baku bantu par pasantren ini bisa bajalang deng bae,” ujar Boy.
Dia tambahkan, Ramadan marupakan momentum panting par kas tambah empati dan kapadulian tarhadap sasama, lebe-lebe par dong yang parlu akang.
Katua Yayasan Pondok Pesantren Hidayatullah Liang Ustaz Muhammad Alwi sampekan rasa syukur deng danke banya par Depidar SOKSI Maluku yang su barbage par anana santri di pasantren itu.
Dia mangaku, pasantren yang dia pimpin masih hadapi barbage katarbatasan dalang mamanuhi kabutuhan santri sahingga bantuan dari barbagai pihak paleng parlu paskali.
“Katong paling tarima kasih par Depidar SOKSI Maluku yang paduli deng kase bantuan. Bantuan ini paleng bararti par katong deng anana santri di sini,” kata Ustaz.
Pada kasampatan itu, Depidar SOKSI Maluku juga kase bantuan kabutuhan pokok barupa 1 ton baras, 100 kilogram gula, deng 100 liter minya goreng par bantu kabutuhan santri di Pondok Pesantren Hidayatullah Liang.
Kagiatan barlangsung dalang suasana hangat. Hadir pangurus SOKSI Maluku, pangasuh pasantren, para santri, deng masyarakat sakitar yang iko dapa rasa manfaat kagiatan barbage di bulang suci Ramadan. (Keket)
