AmbonVibes.com — Jareng Panahang Sampah Sungai Waitomu alias Kali Skip yang tapasang di deka-deka Kantor Dinas PUPR Provinsi Maluku, Kota Ambon lia akang biking hati nae-nae. Sampah batambang tagae jareng musti dapa angka tarus, lebe-lebe kalo ujang basar.
Dar pantauan lapangan, dalang dua hari sakali, patugas kabarsihan tarpaksa angka sampah yang tasangko jareng panahang. Limbah banya paskali tabawa aros aer dar got deng saluran drainase maso ka muara sungai.
Wali Kota Ambon Bodewin Wattimena ada angka akang jadi konten di unggahan akun media sosial pribadi @Bodewin Wattimena, Senen (23/2/2026).
“Volume sampah yang terjaring terbilang sangat banyak. Sampah-sampah tersebut berasal dari got dan saluran air yang bermuara langsung ke sungai. Jika tidak tertahan oleh jaring, limbah itu berpotensi terbawa hingga ke Teluk Ambon dan mengancam kelestarian ekosistem laut serta keindahan teluk yang menjadi kebanggaan masyarakat,” tulis Bodewin.
Manurut Wali Kota Bodewein, jareng panahang sampah memang paleng bantu cegah limbah mangalir ka Labuang Ambon. Mar kondisi itu sakaligus jadi cerminan kasadaran sabageang warga masih randa dalang menjaga kabarsihan lingkungan.
Dia tegaskan, kabiasaan buang sampah sabarang dapa, bae di sungai, kali, got deng ruang publik, masih jadi salah satu panyebab utama pancamaran lingkungan di Kota Ambon.
Pemerentah Kota, kata Bodewin, seng bisa karja sandiri sondor dukungan deng partisipasi aktif masyarakat par sama-sama kalesang kota. Kasadaran kolektif dia nilai manjadi kunci par parsoalan sarupa seng tarus taulang, tarutama waktu intensitas ujang maningkat.
“Kalo bukang katong, mo harap sapa lai? Kalo bukang sakarang, mo tunggu kapan lai?” tegas Bodewin.
Dia harap samangat kabersamaan dan kapadulian lingkungan tarus dapa jaga par biking Ambon barsih, sehat, dan nyaman par samua. Bagi Pemerentah Kota, parsoalan sampah bukang sakadar urusan estetika, malaengkang manyangkut masa depan lingkungan deng kaaerlanjutan ekosistem pesisir yang jadi identitas kota ini. (red)
