Ambonvibes.com — Polres Malra bagara capat. Anggota Brimob Kompi 1 Batalyon C Pelopor Satbrimob Polda Maluku Bripda Masias Siahaya su resmi dapa tahang di sel Polres. Dialah yang dapa tau aniaya siswa Madrasah Aliyah Negeri (MAN) Malra, sampe akhirnya korban maninggal dunya.
Korban nama Arianto Tawakal (14) maninggal di RSUD Karel Sadsuitubun, Langgur, Kamis (19/2/2026), seng talalu lama abis dapa aniaya dar Abang Jago Masias Siahaya di ruas Jalan RSUD Marren, abis pulang salat subuh.
Kapolres Tual Whansi Des Asmoro malalui pesan singkat di WhatsApp, Jumat (20/2/2026), mangaku su tangka Masias Siahaya.
“Saat ini sudah diamankan di Polres,” tulis Kapolres dalam pesan WhatsApp.
Manurut Kapolres, polisi juga su turung cek di tampa kajadiang parkara (TKP) deng su pariksa satu dua saksi.
“Katong jamin palaku mo dapa proses iko hukum deng katantuan yang barlaku. Seng ada tebang pilih dalang kasus ini. Tindakan nanti mo ambe kalo su abis proses panyidikan,” tegas Kapolres Tual.
Manurut informasi yang AmbonVibes.com dapa, korban baku gonceng deng dia pung kakak Nasri Karim (15), ana skolah klas X MAN Malra. Korban dapa pukul pake helm sampe jatuh dar atas motor.
Akibat kajadiang itu, Arianto langsung dapa pandarahan. Dia sempat dapa bawa ka RSUD Karel Sadsuitubun mar maninggal dunya jam 13.00 WIT. Sementara itu, sang kakak alami patah tangan.
Parkara ini mancuat pas abis korban maninggal dunya tagal dapa lipa dar oknum Brimob Siahaya. Pihak kapolisian bilang, proses penyidikan masih terus bajalang untuk ungkap secara manyaluruh kronologi deng motif kajadiang. (Vera)
