AmbonVibes.com – Panatapan kawasan konservasi di Pulau Damer, Kabupaten Maluku Barat Daya dapa tola dari anana muda. Anana muda yang tagabung dalang wadah Persatuan Pemuda Pelajar Mahasiswa Damer (P3MD) di Ambon manyasal sakaligus kabaratan deng SK Menteri yang ator tamaso sampe dong pung jantong kampong deng pulau.
Malalui Surat Keputusan Menteri Kelautan dan Perikanan Republik Indonesia Nomor 4 Taong 2022, Pemerentah tetapkan Kawasan Konservasi Pulau Damer. Anana muda di P3MD Ambon hati seng sanang tagal pemerentah seng parnah bicara deng dong pung orang tatua, masyarakat adat Damer soal kawasan konservasi di Pulau Damer.
Ketua P3MD Ambon Aldi Umkeketo bilang deng tegas, masyarakat adat itu bageang integral dar ekologi Pulau Damer yang seng boleh anggap enteng akang dalang pangambilan kaputusan soal ruang hidop.
Manurut dia, ada tiga alasan utama mangapa dong tolak panatapan kawasan konservasi. Partama, proses itu banar-banar seng ajak masyarakat adat Pulau Damer par dudu bicara sama-sama, itu sama deng seng anggap kabaradaan orang Damer.
Kadua, sabageang basar wilayah yang dong ator par jadi zona inti marupakan wilayah yang salama ini jadi sumber kahidupan masyarakat. Kalo tetapkan akang jadi kawasan konservasi sondor pake mekanisme partisipatif, warga kuatir dong pung aktivitas sosial deng ekonomi taganggu. Akang bisa biking ilang akses masyarakat tarhadap sumber daya alam.
Katiga, kabijakan itu akang mangancam praktik budaya masyarakat yang su manyatu deng alam, macang tradisi bameti. Pambatasan ruang budaya juga bisa biking masyarakat ilang identitas sabage komunitas adat yang su hidop turung-tamurung di Pulau Damer.
Umkeketo bilang, orang Damer su lama jaga kalestarian ekosistem laut malalui praktik lokal macang sasi. Tradisi itu bajalang barsama pemerentah desa deng gareja par jaga sumber daya laut macang lola, taripang, deng teteruga.
Manurut dia, praktik lokal itu manunjukkan masyarakat su lebe dolo biking konservasi, jaoh sabalong ada negara pung kabijakan.
“Kalo konservasi pung tujuan par jaga kalastarian lingkungan, masyarakat Pulau Damer su biking akang dar lama malalui budaya sasi. Negara musti balajar dar praktik masyarakat adat,” ujar Aldi Umkeketo.
P3MD Ambon manuntut pemerentah pusat deng pemerentah daerah kaji ulang SK panetapan kawasan konservasi itu deng kas iko masyarakat adat dalam dialog tabuka deng transparan.
Warga Damer harap panatapan kawasan konservasi musti tetap parhatikan hak masyarakat adat deng jaga kasaimbangan antara parlindungan lingkungan deng kabarlanjutan hidop warga Pulau Damer. (Leo)
