AmbonVibes.com – Pemerentah Kota (Pemkot) Ambon tarima hasil evaluasi Ombudsman RI Parwakilan Provinsi Maluku takait panyalanggaraan palayanan publik. Acara ini dong biking akang di Kantor Ombudsman RI Perwakilan Maluku, Kamis (12/2/2026).
Dalang hasil panilaian itu, Kota Ambon kumbali tahang posisi deng opini pelayanan publik paleng tinggi di Provinsi Maluku. Ambon pung nilai 81,20 dan tetap barada di zona hijau, kategori kualitas tinggi.
Wali Kota Ambon Bodewin Wattimena bilang, capean ini patut par syukur akang, lebe-lebe tagal dalang panilaian taong ini, ada parubahan variabel deng dimensi panilaian dar Ombudsman.
“Katong barsyukur karena di tengah parubahan variabel dan dimensi panilaian Ombudsman, Pemerentah Kota Ambon tetap dapa panilaian palayanan publik dengan kualitas tinggi. Ini marupakan bukti komitmen dan kerja keras saluruh aparatur Pemkot, lebe khusus di tiga perangkat daerah yang jadi lokus panilaian, yaitu Dinas Kesehatan, Dinas Pendidikan, dan Dinas Sosial,” ujar Bodewin.
Dia tambahkan, eso-eso Ombudsman RI mo biking luas cakupan panilaian tarhadap lebeh banya parangkat daerah di lingkup Pemkot Ambon. Tagal itu, samua jajaran pemerentah dapa ajak tetap pegang prinsip paningkatan kualitas layanan masyarakat.
“Beta minta samua jajaran Pemerientah Kota Ambon par tetap pegang prinsip paningkatan palayanan publik yang capat, responsif, transparan, deng jujur. Penilaian bisa nae dan bisa turung satiap taong, mar kalo katong konsisten bakarja layani masyarakat deng bae, maka opini deng hasil panilaian nanti iko katong pung karja nyata,” tandas Bodewin.
Samantara itu, Kapala Ombudsman RI Perwakilan Provinsi Maluku Hasan Slamat bilang, Kota Ambon sampe oras masih jadi rujukan panyalanggaraan palayanan publik di Maluku.
“Kota Ambon tetap partahankan opini palayanan publik tartinggi dibanding samua kabupaten dan kota di Provinsi Maluku. Kota Ambon jua masih ada di zona hijau sampe bisa jadi role model par pemerentah kabupaten/kota laeng di Maluku,” ungkap Hasan.
Manurut dia, capean ini bisa jadi inspirasi par pemerentah daerah laeng par tarus kas nae kualitas layanan publik.
“Par bisa manjadi pemerentah daerah deng palayanan publik tarbaik, saluruh dimensi panilaian musti dapa parhatikan. Yang paleng panting itu bagemana bangong deng jaga kaparcayaan masyarakat tarhadap layanan publik, lebe khusus sektor palayanan dasar macang Dinas Kesehatan, Dinas Sosial, dan Dinas Pendidikan,” pungkas Hasan. (Piere)
