AmbonVibes.com – Kapolda Maluku Irjen Pol Prof Dr Dadang Hartano, SH,. S.IK., M.Si minta warga masyarakat Hitumessing deng Morella manahang diri, tetap tanang, deng jang gampang makang cabar tagal informasi yang balong tantu banar.
“Katong minta masyarakat jang terpancing makang cabar tagal isu-isu ato informasi yang balong jalas sumber deng kabanaran. Parcaya jua par aparat TNI deng Polri yang su ada di lapangan,” ajak Kapolda Maluku sabagemana Kapala Bidang Humas Polda Maluku Kombes Pol Rositah Umasugi sampekan akang.
Kapolda juga tegaskan, samua langkah pangamanan bajalang profesional, proporsional, deng kas taruh kasalamatan warga paleng di muka. Aparat TNI-Polri tarus sinergi pastikan kaamanan, cegah konflik maluas, deng jaga kehidupan sosial masyarakat tetap harmonis.
Kapolda Maluku angka suara macang bagitu, soalnya dua kalompok warga di Hitumessing deng Morella ada baku tatoki, Jumat (6/2/2026) tengah malang sampe amper siang. Tagal bakalae itu, Lima rumah tabakar, ampa warga sipil deng anggota polisi dapa luka, musti barobat di RSUP Leimena deng RS Bhayangkara.
Kapala Bidang Humas Polda Maluku Kombes Pol Rositah Umasugi bilang, paristiwa itu pica sakitar pukul 00.10 WIT. Sekelompok warga biking maso wilayah Negeri Hitu iko jalur pante. Aparat kapolisian yang su siaga langsung ambe tindakan par cegah konflik lebe loas.
Anggota Polri di Pos Pengamanan Dusun Tibang yang dapa dengar bunyi ledakan langsung ambe langkah pangamanan iko prosedur sambil tunggu dukungan tambahan. Par cegah jatuh korban lebe basar, aparat biking panyasuaian taktis dan batahang di titik aman sampe bantuan datang.
Kapolresta Pulau Ambon dan Pulau-Pulau Lease deng jajaran, tarmasuk unsur intelijen, operasional, deng personel bantuan dari Brimob dan Samapta Polda Maluku, langsung turung ka lokasi. Aparat gabungan lakas-lakas sekat wilayah parbatasan, pukul mundur massa, lalu pastikan seng ada eskalasi lanjutan.
“Paristiwa pica jam 00.10 WIT. Aparat yang siaga langsung respons cegah konflik lebe loas, deng lindungi kasalamatan masyarakat. Akibat kajadian itu, lima rumah di Negeri Hitu tabakar. Salaeng itu, dua anggota Polri dan dua warga sipil luka-luka,” ujar Rositah.
Sampe jam 03.00 WIT, aparat pastikan massa su kas tinggal wilayah parbatasan, situasi su bisa takandali. Polisi juga tarus jaga, patroli, deng pandekatan persuasif par tokoh masyarakat deng wargapar jaga stabilitas kaamanan.
Polda Maluku mo kas tamba lebe kuat pangamanan di wilayah parbatasan, kas badiri pos pangamanan, patroli tarpadu, deng pandekatan parsuasif malalui tokoh adat, tokoh agama, deng tokoh masyarakat.
Respons capat aparat dalang peristiwa ini biking konflik horisontal seng jadi lebe loas. Pandekatan pangamanan deng imbauan persuasif par masyarakat jadi kunci utama par redam eskalasi di wilayah itu.(red)
