AmbonVibes.com – Oras ini, ada sistem aplikasi nasional par tongka pambangunan infrastruktur di samua tampa, tarmaso Maluku. Jadi, pagawe pemerentah di kabupaten/kota tinggal dudu di muka laptop, konek internet, buka aplikasi lalu input-input data. Akang haringang sa, seng barat macang orang pikol balok dar utang ka kampong.
Tarnyata, input-input data par usulan proyek dar pemerentah kabupaten deng kota di Maluku, akang tarlambat. Tagal itu, jang heran banya rancana pambangunan infrastruktur di Maluku jadi tahambat.
Tarlambat input usulan di sistem aplikasi nasional ini, bar dapa tau waktu Komisi III DPRD Maluku baku komunikasi intensif deng Direktorat Jenderal Bina Marga Kementerian Pekerjaan Umum. Ketua Komisi III DPRD Provinsi Maluku Alhidayat Wajo bilang akang, Jumat (6/2/2026).
Alhidayat kastau, mekanisme pambangunan infrastruktur oras ini su pake platform digital nasional yang su ada standarisasi dan pung batas waktu input yang katat. Tarlambat kas maso usulan proyek ka dalang sistem akang pung dampak langsung di realisasi pambangunan daerah jadi tatunda.
“Salah satu faktor utama mangapa pambangunan infrastruktur di Maluku macang tarlambat, itu tagal usulan barbagai kabupaten dan kota saring talambat maso ka dalang sistem aplikasi. Samua proses sakarang su standarisasi nasional, jadi seng ada kalonggaran waktu,” jelas Alhidayat.
Dia tegaskan, samua pemerentah kabupaten/kota di Maluku musti lebe aktif deng disiplin dalang mangalola proses administrasi. Katapatan waktu input usulan jadi kunci par program pambangunan bisa tarakomodasi dalang parancanaan nasional.
Kalo tarjadi kendala teknis saat input, Alhidayat imbau pihak takait tetap barupaya sampe usulan barhasil tadaftar dalang sistem.
“Katong seng bisa kase salah sistem, karena samua daerah di Indonesia pake yang sama. Sakarang, parlu sikap proaktif dar satiap pemerentah kabupaten/kota par jang kas lewat kasampatan pambangunan,” tegas Alhidayat.
Salaeng masalah input usulan yang talat, Alhidayat juga khawatiran deng katidakhadiran sajumlah kapala dinas dalang rapat evaluasi pambangunan yang baru Komisi III DPRD Maluku biking akang.
Dia soroti parwakilan Kabupaten Maluku Tengah dan Maluku Tenggara yang seng iko rapat itu sondor ada kase tau apa-apa lebe dolo.
“Katong paleng manyasal akang, karena rapat evaluasi ini manyangkut kapantingan masyarakat banya. Pambangunan infrastruktur itu tulang punggung kamajuan daerah, musti taruh akang jadi prioritas utama yang seng bisa anggap enteng akang bagitu,” tutup Alhidayat. (Leo)
