AmbonVibes.com – Tagal parkara kintal sapanggal, Royke Marthen Madobaafu takotang tamaso lebe jao di muka polisi, jaksa, hakim. Dia lebe suka pilih maeng enggo lari, enggo sambunyi deng aparat.
Bukang maeng-maeng, bukang baku sedo. Roy Marthen lari sambunyi di balakang kampong, di utang-utang. Bukang sahari dua hari, bukang samalang dua malang. Seng. Roy Marthen maeng di utang-utang makang bulan makang taong. Dua taong tujuh bulang, itu seng pende.
Laste-laste, semua jurus tupai balumpa, tetap jatuh jua. Polisi dapa Roy Marthen di dia pung tampa sambunyi, goa batu di hutan pegunungan Desa Pasinalu, Kecamatan Taniwel Timur, Kabupaten Seram Bagian Barat (SBB), Selasa (3/2/2026) dini hari. Ini tampa yang susah orang sampe, jao di ilang-ilang puluh, mar tim loko dia jam 02.10 WIT.
Sapa-sapa yang tangka Roy Marthen? Ini tim gabungan bentukan Kapolda Maluku Irjen Pol Prof Dr Dadang Hartanto. Dansat Brimob Polda Maluku pimpin tim, lalu kas iko personel Ditreskrimum Polda Maluku, Sat Brimob, dan Polres SBB.
Juru Bicara Polda Maluku Kombes Pol Rositah Umasugi bilang, operasi panangkapan ini jadi bukti Kapolda Maluku serius paskali par biking beres parkara kajahatang par anana.
“Dar Agustus 2025, tim gabungan su bagara buru dalang utang. Ini bukang tugas gampang, mar jadi prioritas pimpinan,” ujar Rositah.
Menurut Rositah, operasi ini bajalang senyap dan pono risiko, tagal medan hutan pagunungan yang barat deng minim akses ka lokasi parsambunyian.
Dirreskrimum Polda Maluku Kombes Pol Dasmin Ginting tambahkan, kaberadaan palaku sabenarnya su lama dapa deteksi aparat. Mar faktor cuaca, medan ekstrem, dan keterbatasan akses jadi kandala utama par pi loko dia.
“Malalui video yang katong rilis, masyarakat bisa lihat bagemana tantangan tugas yang katong hadapi siang malang,” kata Dasmin.
Saat dapa tangka, Roy Marthen seng malawang. Dia pung kondisi fisik pun seng talalu bae tagal lama basambunyi di hutan deng goa pagunungan.
Abis dapa tangka, Roy Marthen langsung dapa bawa par proses hukum lebe lanjut. Polda Maluku juga pastikan barkas perkara mo lakas ovor ka kejaksaan.
“Katong su parentah Subdit PPA par lakas kirim berkas tahap satu ke Kejaksaan,” tegas Dasmin.
Amper tiga taong dalang utang rimba Seram, Roy Marthen mampu batahang. Apa mungkin dia sasandiri areng-areng? Seng ada orang batamang, baku bantu par biking lancar dia pung palariang deng parsambunyian?
Kalo memang ada, siap sadia saja, tagal polisi jua ada mo biking pangambangan parkara. Jadi, polisi juga mo cari tau, sapa bantu Roy Marthen balari basambunyi. (red)
