AmbonVibes.com – Ambon samantara bahias diri jadi Smart City alias kota cardas, kota pande. Istilah ini su rame dar tempo hari. Sakarang akang bajalang bagemana, hasil macang apa, susah-sanang bagemana, samua itu dapa evaluasi di Ruang Vlissingen Balai Kota Ambon, Rabu (4/1/2026).
Dalang pambukaan kagiatan Evaluasi Pelaksanaan Smart City, Wali Kota Ambon Bodewin Wattimena harap samua parangkat daerah bisa dapa gambaran komprehensif takait capean mopun tantangan par Kota Ambon dalang panyalanggaraan smart city.
Bodewin juga mandorong evaluasi ini kas kaluar rekomendasi konkret dan aplikatif, par bisa jadi dasar panguatan implementasi smart city, eso-eso.
“Smart city musti taintegrasi lintas sektor deng jadi landasan dalang parancanaan sampe palaksanaan pambangunan daerah,” tandas Bodewin.
Bodewin bilang, Pemerentah Kota Ambon tetap pegang komitmen biking Ambon jadi kota cerdas, inovatif, dan barkalanjutan. Dia bilang dangke banya par pemerentah pusat malalui Kementerian Komunikasi Digital RI juga kementerian dan lembaga terkait, yang su kase kasempatan par Kota Ambon jadi bagean dari evaluasi implementasi smart city di Indonesia.
Manurut Bodewin, evaluasi ini jadi momentum strategis par nilai capeam yang su dapa, identifikasi barbage tantangan, sakaligus rumuskan langkah-langkah konkret par biking kuat smart city.
“Evaluasi ini bae skali par pastikan arah pambangunan smart city Kota Ambon akang sajalang deng kabutuhan masyarakat, dan tujuan pambangunan daerah,” ujar Bodewin.
Bodewin tegaskan, panyalanggaraan smart city di Kota Ambon seng orientasi ke pemanfaatan teknologi digital saja. Lebe dar itu, smart city jadi bageang dar transformasi tata kalola pemerentahan dan palayanan publik par jadi lebih efektif, efisien, deng responsif tarhadap kabutuhan warga.
“Smart city itu upaya mambangun sistem pemerentahan dan pelayanan publik yang lebe bae, bukang hanya soal teknologi, mar bagemana teknologi itu pake par jawab kabutuhan masyarakat,” jelas Bodewin.
Dia tambahkan, pangambangan smart city jadi bageang penting dalam mandukung program prioritas Wali Kota dan Wakil Wali Kota Ambon periode 2025–2030, lebe khusus program prioritas nomor 13, yakni malanjutkan pambangunan Ambon Smart City.
Bodewin juga paparkan sajumlah inovasi strategis dar Pemerentah Kota Ambon sapanjang taong 2025, antara laeng Call Center 112 sebagai layanan panggilan darurat, program WAJAR dan Kaluar Bacarita sebagai sarana komunikasi antara pemerintah dan masyarakat, serta pengelolaan sampah berbasis Material Recovery Facility (MRF) dan Refuse Derived Fuel (RDF).
Salaeng inovasi, Bodewin ungkapkan capean yang patut bilang syukuri yakni Indeks Pelayanan Publik (IPP) Kota Ambon Taong 2025 yang dapa angka 4,06 dar skala maksimal 5,00 lalu maso kategori A-.
“Prestasi ini mancarminkan paningkatan kualitas palayanan publik di Ambon dan jadi bukti reformasi birokrasi deng inovasi palayanan yang katong lakukan su kase hasil yang positif,” ungkap Bodewin.
Kapala Dinas Komunikasi, Informatika dan Persandian Kota Ambon Ronald Lekransy bilang dalang rapat itu, langkah kunci yang musti ambe adalah penyusunan Peraturan Daerah (Perda) tentang Panyalanggaraan Ambon Smart City.
Ronald juga kastau, dalang Master Plan Ambon Smart City, ada 45 program. Sapanjang taong 2025, Pemkot bisa biking 32 program sampe klar, bahkan tambah anam program di luar master plan,” ungkap Lekransy. (Piere)
