AmbonVibes.com – Anggota Komisi II DPRD Provinsi Maluku Ary Sahertian mangaku hati balisa tagal pandapatan daerah belum dapa target, bae dar sektor pajak, retribusi, sampe karja sama deng pihak pangelola dan parusahaan takait.
“Evaluasi tarhadap dinas pangumpul pandapatan salalu bajalang tiga bulang sakali ato per triwulan semester, mar di akhir taong justru ada banya yang seng sasuai. Banya wajib pajak deng retribusi yang seng kas ganap parsyaratan, sahingga pandapatan daerah seng dapa target,” ujar Ary, saat dihubungi dari Ambon, Rabu (4/2/2026).
Manurut Ary, Inspektorat sabage lambaga pangawasan internal daerah, musti maeng peran aktif par deteksi masalah dar awal.
“Kalo evaluasi su biking sacara barkala satiap semester mar masalah masih muncul di akhir taong, bararti pengawasan balong maksimal. Kalo hal ini tarus tarjadi, artinya pangawasan seng bajalan deng bae, apalai kalo banya pihak seng bayar maski su malalui tahapan evaluasi ulang-ulang,” jelas Ary.
Ary tegaskan, kondisi ini bawa dampak nyata par kinerja kauangan daerah sakarang ini. Dia juga bilang, parlu tindakan tegas par pajabat yang seng mampu dapa target.
“Minta maaf kalo musti barsikap tegas, kalo syarat deng target pancapaian su jelas mar seng tacape, beta rasa parlu langkah konkret macang pamacatan kepala dinas takait,” tegas Sahertian.
Katika bahas pangalolaan Pasar Mardika, Ary yang parnah jadi anggota DPRD Kota Ambon manjalaskan, kewenangan pangalolaan berada di Pemerentah Kota (Pemkot) Ambon.
“Beta tau deng jalas hal ini, jadi parlu komunikasi erat antara provinsi deng kota, takait deng para pedagang. Kamuka ada informasi bahwa dar target yang mo cape akang, dar total lebe 1.800 orang, yang bayar pajak cuma sakitar 200 pedagang. Kondisi ini paleng seng wajar,” kata Ary.
Dia bilang, tempo hari waktu proses pamindahan pangalolaan pasar ke provinsi, parnah tarjadi kendala, dan kini parlu koordinasi yang lebe bae supaya kabijakan antara kadua pemerentahan selaras.
“Sabage contoh, dolo ada kabijakan wali kota par kas tartib parkir liar beta dukung pono-ponoh. Waktu itu, pandapatan parkir bisa Rp4 juta per hari. Mar iko data oras seng ada lagi kontribusi pandapatan dar sektor itu. Maka beta kas inga sakali lai, katong seng boleh sungkan par koordinasi karena kapantingan Maluku dan Kota Ambon akang yang utama, deng kawenangan katong baku takait,” jelas Ary.
Salaeng itu, Ary juga tekankan parlu rekomendasi resmi dar pemerentah provinsi, takait hasil evaluasi kinerja dinas pendapatan daerah.
“Katong samua rasa prihatin, tagal pandapatan amper seng dapa target sama sekali. Parlu koordinasi antar dinas deng pandapatan daerah musti kas nae par samua bisa dapa target,” ujar Ary.
Soal kontrak deng pihak pangalola fasilitas daerah, Ary bilang konsep kontrak seng boleh kas izin pihak pangalola pake alasan karusakan fasilitas sabage dasar par seng membayar.
“Waktu biking kontrak, seng ada klausul bilang, ‘bahwa karusakan bisa jadi alasan par seng mo bayar. Karusakan salama masa pangalolaan musti pung panjalasan yang jalas, seng bisa langsung jadi alasan manghindari kawajiban pambayaran,” papar Ary.
Dia sampekan rasa kuatir takait data setoran dari Pertamina.
“Katong ulang-ulang minta data namun sampe oras balong dapa info jalas deng taparcaya. Padahal dalang manjalankan tugas pangawasan, katong parlu tau pasti barapa kuota minya yang maso ka wilayah Maluku, par bisa hitong basar satoran yang daerah tarima. Betaharap, ada rekomendasi resmi par katong bisa tau jumlah kuota BBM yang maso dan akang pung kontribusi pendapatan musti kase ka daerah,” harap Ary. (Leo)
