AmbonVibes.com – Parkara yang sampat jadi polemik hukum antara Pemerentah Kota Ambon deng dua aktivis mahasiswa, banar-banar su abis. Wali Kota Ambon Bodewin Wattimena su cabu laporan pangaduan tarhadap Mujahidin Buano deng Osama Rumbouw di Mapolresta Pulau Ambon dan Pulau-Pulau Lease.
Kapala Bageang Hukum Setda Kota Ambon Lexy Manuputty pi cabu akang laporan itu, har Senen (2/2/2026). Samua ini tagal har Jumat kamareng, Wali Kota deng dua aktivis su baku dapa.
Har Jumat kamareng, Mujahidin dan Osama baku dapa langsung deng Bodewin Wattimena. Dong dua banar-banar minta maaf deng tulus. Dong mangaku kaliru deng narasi seruan aksi di media sosial yang pung nada-nada manyarang kahormatan personal pimpinan daerah.
Lexy bilang, maski secara pribadi, Bodewin rasa hati luka deng tuduhan itu, mar dia pilih jalur baku maaf par biking kota ini kondusif.
“Wali Kota su minta cabu laporan. Ontua pasang, maski ada rasa sakit hati dan beda pandangan, mar hidop musti baku sayang deng baku maaf, itu lebe panting par bangong Kota Ambon sama-sama,” ungkap Lexy.
Kamuka, dong dua aktivis dapa lapor atas dugaan biking busu nama bae deng fitnah sabagemana dapa ator dalang UU ITE dan KUHP baru. Masalah ini akang muncul tagal flyer seruan aksi di media sosial pake narasi tajam: “Tangkap dan penjarakan Wali Kota Ambon atas penerimaan retribusi dari tambang yang diduga ilegal serta semua pihak yang terlibat dalam dugaan tambang ilegal di Kota Ambon.”
Pemkot Ambon sempat manilai narasi itu sondor dasar deng cenderung fitnah. Mar, deng su cabu laporan ini, kadua belah pihak sapakat ruang dialog deng komunikasi tabuka jao lebe efektif darpada pake paradilan.
Langkah yang Wali Kota Ambon ambe, dapa banya respon positif, sabage tanda dewasa demokrasi. Lexy bilang, kritik tetap boleh selama tidak lewat batas fitnah.
Sakarang, Mujahidin deng Osama bole tarek napas lega. Dong su bebas dar ancaman hukuman tagal ada panyalasean kakaluargaan. (Keket)
