AmbonVibes.com – Ini carita biking emosi orang-orang kampong di Seram Utara Timur Kobi, Maluku. Persisnya warga kampung Kobisadar. Bukang maeng-maeng, 470 warga di sana simpang kepeng di Bank Rakyat Indonesia (BRI). Laste-laste, baru dong sadar lah bataria jua. Dong pung saldo di rekening tacukur abis jadi nol Rupiah.
Skandal ini taangka dalang Rapat Dengar Pendapat (RDP) di Baileo Rakyat Karpan Ambon, Senen (02/02/2026). Raja Negeri Kobisadar Muhammad Saleh Qiyali buka akang kronologi yang biking hati warga tairis-iris dar bulang November 2025.
Qiyali kastau, warga mulai hati susah waktu petugas bank tagih dana Kredit Cepat (KCe) sabasar Rp10 juta, sampe tengah malam. Padahal, warga sama sekali seng parnah tarima ato tekeng pinjaman itu. Akang jadi lebe parah waktu sistem perbankan secara otomatis potong abis samua gaji yang maso ka rekening nasabah.
“Ada warga yang pung gaji maso Rp6 juta sampe Rp7 juta, mar langsung tapotong abis. Katanya par cicilan KCe. Padahal dong seng parnah rasa pinjam kepeng ke bank. Akang pung logika, kalopun ada cicilan, musti potong iko angsuran, bukang ambe samua sampe saldo nol,” tegas Qiyali.
Warga pung marah sampe di puncak, Desember 2025. Kepeng yang dong su tahang-tahah akang par kaparluan ibadah Natal deng kabutuhan kaluarga, justru ilang tagal sistem bank. Akibat status “menunggak” ini, ratusan warga sakarang maso daftar hitam parbankan dan seng bisa ajukan kredit di tampa laeng.
Katua Komisi III DPRD Maluku Alhidyat Wajo langsung desak BRI Cabang Masohi par lakas biking abis deng cara audit internal. Dia tekankan, BRI adalah tumpuan utama transaksi masyarakat di kampung-kampong Maluku, jadi musti jaga kaparcayaan publik.
“BRI su barjanji, Februari ato Maret ini ada panyalaseang. Katong tegaskan agar audit kas capat par ada kapastian hukum deng kamungkinan pamulihan ato pamutihan nama-nama nasabah yang su dapa rugi,” ujar politisi PDI Perjuangan itu.
Branch Manager BRI Masohi Dani Ridian bilang, dia su pung komitmen par tindak tegas satiap bentuk kacurangan (fraud), bae yang libatkan oknum internal mopun mitra karja macang agen BRILink (agen billing).
“Katong seng kase toleransi. Hasil audit nanti mo katong kas tarus ka jalur hukum. Di situlah akang tabuka sapa yang tarlibat, agen billing kah, internal katong,” tegas Ridian.
Dia ungkapkan, sapanjang taong 2025, BRI su biking Pemutusan Hubungan Kerja (PHK) par sajumlah pagawe yang ada bukti dong biking palanggaran serius. Takait kasus Kobisadar, audit manyaluruh tarhadap transaksi agen billing dar awal operasi sampe sakarang, kantor pusat masih karja akang.
“Masyarakat minta pamotongan dana kas stop samantara. Mar sacara hukum, ada parjanjian yang su tekeng. Katong tunggu hasil audit komprehensif dar pusat par buktikan sapa yang korban dan bagemana akang pung mekanisme panyalaseang,” pungkas Ridian. (Leo)
