AmbonVibes.com – Sepande-pande tupai melompat, dia kan jatuh jua. Ini parumpamaan lama yang pas par
carita palarian Royke Marthen Madobaafu. Bakas Camat Taniwel Timur Kabupaten Seram Bagian Barat (SBB) itu mangambara sabage buronan polisi lalu akhirnya dapa loku sabage manusia gua.
Amper tiga taong lari ka sana kamari, Royke musti tarima kanyataan dapa loko Tim Satuan Brimob Polda Maluku, Salasa (3/2/2026). Royke buron dar bulang November 2023. Dia dapa duga biking tindak pidana asusila par ana skola SMK di SBB.
Dalang operasi pancariang, Tim Satuan Brimob Polda Maluku tabage dua regu. Iptu AF Soulissa pimpin Regu I, dong sisir wilayah Hutan Sawely, samantara Ipda Mustakim pimpin Regu II deng fokus pancariang di kawasan Hutan Nukihay.
Karja karas dua tim ini akhirnya babuah manis. Royke dapa krep di dia pung tampa sambunyi. Tampa itu seng laeng barupa gua alam di hutan Souhuwe, Kacamatan Taniwel Timur, SBB. Dia dapa loku, pas tengah hari sakitar jam 01.50 WIT.
Abis loko Royke, tim gabungan bawa dia langsung bagara ka Kota Ambon par iko proses hukum lebe lanjut. Pas sampe di Ambon, tarsangka dapa antar ka panyidik Direktorat Reserse Kriminal Umum (Reskrimum) Polda Maluku.
Panyarahan tarsangka oleh Komandan Batalyon B Pelopor Satuan Brimob Polda Maluku Kompol Sy Basahona, ka panyidik Reskrimum par panyidikan lanjutan.
Panangkapan bakas camat yang lama buron ini memang su jadi bageang dar komitmen Polda Maluku par panagakan hukum deng kase rasa aman, juga kapastian hukum par masyarakat.
Aparat kapolisian tegaskan, satiap palaku tindak pidana pasto dong iko sampe dapa lalu proses hukom iko atorang yang barlaku, sondor pangacualian. (red)
