AmbonVibes.com — Wakil Ketua DPRD Provinsi Maluku Johan Lewerissa bilang, paningkatan pandapatan pajak daerah paleng penting paskali. Mar untuk kas nae akang, parlu biking kuat sinkronisasi antar Organisasi Perangkat Daerah (OPD) di lingkup Pemerentah Provinsi Maluku.
Manurut Johan, deng ada Peraturan Pemerintah (PP) Nomor 1 Taong 2025 musti lia akang deng bae sabage momentum par Provinsi Maluku biking inovasi deng karja karas dalang optimalisasi panagihan pajak.
“PP Nomor 1 Taong 2025 jadi dorongan par daerah, tarmasuk Maluku, par lebe kreatif deng sarius kalola deng tarik pajak daerah,” ujar Johan Lewerissa par wartawan di Ambon, Kamis (29/1/2026).
Johan bilang, parlu ada analisis yang dalang tarhadap realisasi panarimaan pajak deng hitung rasio antara target deng capean, lalu bandingkan datadari taong ka taong. Langkah ini dia nilai panting par tau faktor panyebab kanaikan atau panurunan pandapatan.
“Target pajak musti realistis deng pake basis potensi yang jelas. Jang cuma kas nae angka target mar sondor hitung deng bae,” tegas Johan.
Dia bilang, kalo ada sumber pajak baru, musti dapa tongka deng regulasi yang bae par seng jadi hambatan dalang implementasi di lapangan.
“Kalo ada potensi pajak baru, itu musti ada dapa dukung deng Peraturan Daerah ato Peraturan Gubernur. Regulasi ini panting par proses pungut seng barmasalah sacara hukum,” jelas Johan.
Salaeng parsoalan pajak, Johan juga ungkel sinkronisasi antar OPD, lebe khusus antara bidang hukum deng pardagangan. Manurut dia, parbedaan tafsir atorang ato analisis kabijakan, kadang-kadang biking ragu deng hambat panyalasaian masalah.
“Padahal samua OPD ini satu kesatuan dalang pemerentahan. Kalau seng baku tamaso, yang rugi itu pemerentah sandiri,” kata Johan.
Dia manilai, koordinasi yang seng baku tamaso akang pung potensi biking lambat pangambilan kaputusan strategis, tarutama dalang pangalolaan aset dan pandapatan daerah.
Johan juga singgung sajumlah perusahaan yang balong bayar dong pung kawajiban par pemerentah daerah dar awal taong, maski su taika dalang parjanjian karja sama.
“Kalo sudah ada parjanjian yang mangatur hak deng kawajiban, maka itu musti tundu iko akang. Tagorang hukum su kase, dan kalo seng tindaklanjut, tantu akang maso ka proses pangadilan,” ungkapnya.
Dia tegaskan parlu negosiasi bae-bae, mar tetap tegas lindungi kapentingan daerah. Kalo parusahaan seng mo bayar kawajibang, maka kalanjutan parjanjian musti lia-lia akang ulang, Aset pemerentah musti dapa kalola sacara profesional deng kase untung par daerah,” tegas Johan. (Leo)
