AmbonVibes.com – Anana muda yang tagabung dalam Gerakan Sayang Maluku (GSM) biking refleksi akhir taong. Manurut dong, Maluku ini tanah dame, maski sakali-kali anana muda baku tahela sampe bakalae seng abis-abis.
Koordinator GSM Yani Salampessy dalang siaran pers bilang, GSM tatap parcaya orang Maluku masih hidop dame, baku sayang satu sama laeng, maski pada waktu yang sama, ada satu dua anana muda suka paskali par kaco-kaco.
Sacara khusus, dalang refleksi itu, GSM fokus lia parkara bakalae antara tiga kalompok anana muda yang tinggal deka-deka Kampus Ijo Universitas Islam Negeri (UIN) A. M. Sangadji Ambon. Dar bakalae-bakalae itu, su dapa tau anana muda sampe su bawa nama-nama daerah macang Kailolo, Kei, deng SBT.
Tagal dong su bakalae ulang-ulang, lalu rame di media sosial, mar akang balong sampe baku bae. Padahal, Wali Kota Ambon su ulang-ulang kase pasang, buju dong, bae deng stori di media, ato turung langsung di lokasi bakalae.
Polisi, TNI, Wali Kota Ambon, bahkan Gubernur Maluku samua su angka suara. Mar sampe oras, balong ada parnyataan dar tiga kelompok anana muda par barenti bakalae.
GSM minta ampa kapala daerah di Maluku, jang dudu tampa, pura-pura seng tau apa-apa. Padahal, nama kampung, suku, kabupaten su tabawa-bawa. Ampa kapala daerah itu Bupati Maluku Tengah, Bupati Seram Bagian Timur, Bupati Maluku Tenggara, deng Wali Kota Tual.
“Datang ka Ambon, bawa tokoh adat, dudu sama-sama deng Wali Kota Ambon, Raja Batumerah, juga kalompok anana muda yang bakalae-bakalae. Dudu baku buka, carita orang sudara supaya stop bakalae,” kata Koordinator GSM Yani Salampessy.
Yani taruh harap par ampa kapala daerah bangong komunikasi deng Wali Kota Ambon, lalu dong rancang bagaimana bisa baku dapa, dudu-dudu par biking klar masalah sabage orang basudara.
Manurut Yani, kalo seng ada intervensi model itu, lalu anana muda tinggal bakalae, baku jaga, lama-lama akang jadi kabiasaan. Konflik nanti seng abis-abis, lalu anana muda deng orang banya akang biking hal-hal pele-pele jalang raya, bakar rumah, baku lempar, sampe baku warmus.
“Kalo tiga bupati deng satu wali kota bisa iko tamaso urus dong pung anana daerah yang ada marantau par studi deng cari hidop di Ambon, lalu samua bisa sapakai dame, maka taong 2026 bisa biking akang jadi taong sondor kakarasan kalompok,” sebut Yani.
Yani mangaku par AmbonVibes, sacara pribadi dia deng kaluarga salalu jadi saksi baku lempar di deka-deka Kampus UIN A. M. Sangadji, tagal dia pung rumah di situ.
“Dong bakalae pas di muka rumah, lalu orang-orang yang seng iko bakalae tarutama parangpuang deng anana kacil paleng tako tagal seng aman,” ungkap Yani.
Yani harap masalah tiga kalompok ini bisa lekas abis jua. Deng bagitu, samua bisa hidop normal kumbali, seng ada baku marah, baku dendam, baku jaga. (Opa)
