AmbonVibes.com — Satu unit oto Toyota Avanza warna utang angos tabalar di ruas JalangJenderal Sudirman, parsis di deka-deka Hotel Santika, Kota Ambon, Minggu (25/1/2026) sakitar jam 18.30 WIT.
Paristiwa ini sampat biking macet panjang di sapanjang jalur utama. Untung bae polisi datang evakuasi akang.
Mobil nomor polisi DE 1353 AB itu bar abis isi bahan bakar minyak (BBM) di SPBU Kabung Cengkeh. Seng lama dari situ pas maso jalang raya Sudirman, kage lalu api su nae dar bageang dalang lalu capat paskali jadi basar.
Mobil itu, dapa kira tampung BBM subsidi, mar panyebab pasti kabakaran masih dalang panyalidikan aparat kapolisian..
Patugas Pamadam Kabakaran Kota Ambon Deng personel Polsek Sirimau langsung biking pamadaman deng evakuasi kandaraan ka pinggir jalang par kas lancar lalu lintas skaligus par panyalidikan.
Wakapolsek Sirimau Ambon Ipda Jaenal mangaku balong bisa tau pasti panyebab kabakarang.
“Balong bisa kase katarangang. Tim ada samantara panalidikan. Katong balong tau unsur panyabab, deng juga apa yang oto itu muat,” ujar Jaenal wartawan di lokasi kajadiang.
Informasi kabakarang partama kali dapa tarima Dinas Pamadam Kabakaran dan Panyalamatan (Disdamkarmat) Kota Ambon malalui Call Center 112 jam 18.46 WIT. Laporan barasal dar warga nama Ibu Cece yang lia langsung kajadiang itu.
Bagitu dapa laporan, Disdamkarmat Kota Ambon bagera capat kas turung personil ka lokasi jam 18.55 WIT, cuma 9 manit su sampe. Kacapatang respons ini par cegah api maloas tagal di tampa kajadiang ada banya aktivitas masyarakat.
Bardasar hasil pamantauan awal di lapangan, kabakaran dapa duga tagal ada minya tatumpah dalang oto lalu picu percikan api, sampe oto tabakar.
Api sempat nae basar mar patugas lakas kasnkalah akang sabalong akang marambat ka kandaraan deng bangunang laeng di sakitar tampa kajadiang.
Dalang aksi pamadaman, Disdamkarmat Kota Ambon kas turung dua oto pamadam deng 20 personel, pake dua unit Alat Pemadam Api Ringan (APAR) par biking capat api mati.
Api banar-banar mati dan situasi aman kumbali jam 19.25 WIT. Semua personel pamadam langsung bale ka Markas Komando.
Kapala Dinas Pemadam Kebakaran dan Penyelamatan Kota Ambon Alfredo J. Hehamahua, AP., M.Si, mambanarkan paristiwa kabakarang oto Avanza.
“Banar, ada satu unit oto tabakar di Batumerah. Bqgitu laporan maso, patugas langsung ka lokasi. Api dapa padam deng capat dan sondor korban jiwa,” ujar Alfredo, Minggu.
Dia mangimbau masyarakat par tingkatkan kawaspadaan tarhadap potensi kabakarang, khususnya kandaraan barmotor.
“Katong kas inga warga par salalu pastikan kondisi kandaraan dalang kaadaan bae, manghindar kabocoran bahan bakar, deng lakas lapor ka layanan darurat kalo lia ato alami kajadiang kabakarang,” tambahnya.
Sabage bantuk palayanan par masyarakat, Disdamkarmat Kota Ambon kumbali kas inga nomor layanan darurat kabakaran yang bisa pangge yakni Pos Ambon (0911-351113), Pos Passo (0911-361113), Pos Hative Besar (0911-3670113), serta Call Center Nasional 112. (red)
