AmbonVibes.com — Dar mimbar Gareja Eben Haezer Jamaat GPM Kariu sampe tenda-tenda pangungsian, Gubernur Maluku Hendrik Lewerissa tegaskan satu pasang kuat: Negara seng akang kas tinggal masyarakat Kariu. Pasang itu dia sampekan langsung dalang ibadah Minggu deng warga Kariu, Kecamatan Pulau Haruku, Kabupaten Maluku, Minggu (18/1/2026).
Kahadiran Gubernur Deng Nyora Maya Baby Lewerissa, yang juga Katua TP-PKK Provinsi Maluku, bukang sakadar agenda seremonial. Bagi warga Kariu, kunjungan ini akang jadi simbol empati deng harapan baru setelah bartaong-taong hidop dalang bayang-bayang konflik sosial deng tampa tinggal yang seng tantu.
Salaeng Gubernur Deng Nyora, Iko juga sajumlah pimpinan Organisasi Perangkat Daerah (OPD) Provinsi Maluku, antara laeng Plt Kapala Dinas Perumahan Rakyat dan Kawasan Permukiman (PRKP) Nurlita Soulisa, Plt Kapala Dinas PUPR Hengky Tamtelahitu, Kapala Dinas Kominfo Melky Lohy, Kapala DPMPTSP Robby Tomasoa, Kapala Dinas Lingkungan Hidup Roy Syauta, Kapala Biro Pemerintahan Boy Kaya, Kapala Biro Hukum Hendrik Herwawan, deng Kapala Biro Administrasi Pimpinan Setda Maluku Fibra Breemer.
Dalang sambutan di muka jamaat, Hendrik Lewerissa bicara deng pono empati. Dia mangaku pung kerinduan khusus par kumbali ibadah deng warga Kariu.
“Karinduan beta par bale kumbali ibadah deng Jamaat Kariu akhirnya Tete Manis kase izin har ini. Beta parnah janji mo bale, dan har ini beta datang bukan cuma sabage Gubernur, mar sabage sudara seiman,” ujar Hendrik.
Dia tegaskan, kahadiran di Kariu itu bentuk tanggung jawab moral deng kabarpihakan nagara par warga nagara
“Beta seng mo warga Kariu rasa tatinggal. Beta mo basudara samua rasa nagara hadir, pemerentah ada, deng katong ada sama-sama di Kariu,” tegasnya.
Maski musti bage perhatian ke samua wilayah Maluku, mulai dar Tenggara Raya, Buru, Seram, Banda sampe Ambon, Hendrik mangaku Kariu pung tampa sendiri di dalang hati.
“Beta badiri di sini bukang cuma sabagai Gubernur Maluku, mar sabagai warga gereja deng sudara seiman,” katanya.
ABis ibadah, Gubernur deng rombongan pi tinjau langsung tenda-tenda pangungsian. Di lokasi itu, kondisi paleng prihatin masih dapa lia jalas. Dari total kebutuhan pembangunan rumah pascakonflik, bar sakitar 50 unit yang klar, sadangkan 207 unit rumah balong bangong, masyarakat masih batahang di tenda darurat.
Lewerissa jelaskan, secara regulasi pambangunan rumah pascakonflik marupakan tanggung jawab pemerentah pusat malalui kementerian takait. Mar, Hendrik tegaskan pemerentah daerah seng boleh tinggal badiang.
“Kalo masyarakat su bataong-taong hidop dalam penderitaan, tinggal di tampa yang seng layak, lalu pemerentah diam saja, itu seng mungkin. Pemerentah yang bae harus barani ambe kaputusan par rakyat,” tegasnya.
Tagal itu, Pemprov Maluku pung komitmen taong 2026 mo bangong kumbali rumah warga Kariu yang balong klar.
“Katong mo komunikasi deng pemerentah pusat. Kalo ada program lanjutan, katong dukung. Mar kalo seng, pemerentah provinsi mo ambe alih tanggung jawab itu,” ujarnya.
Waktu dudu dialog deng warga, Gubernur dengar langsung kaluhan Empi, salah satu pangungsi.
“Kalo ujang, aer maso ka dalang tenda,” keluh Empi.
Mendengar hal itu, Hendrik merespons spontan. “Mo barapa lama masyarakat katong hidop macang ini? Ini seng boleh.”
Oras ini, Pemprov Maluku ada kas jalang program Manggurebe Biking Bae Rumah, yang dar taong 2025 su bangong 204 unit rumah deng rencana mo lanjut taong 2027 deng skala lebe basar. Gubernur buka peluang par Kariu maso dalang skema program itu, setelah ada kajalasan pambagian kewenangan deng pemerentah pusat.
Di akhir kunjungan, Lewerissa ajak masyarakat Kariu par bajalan deng pemerentah dalang proses pamulihan deng pambangunan.
“Kalo pemerentah datang par bangong, beta mohon dukungan masyarakat. Sorong bahu, masohi sama-sama. Pemerintah seng bisa karja sandiri,” pungkasnya. (red)
