AmbonVibes.com — Wali Kota Ambon Bodewin Wattimena bilang, parayaan Kajadiang seng boleh barenti di ibadah deng simbol saja, malaengkang musti malalui karja nyata yang biking rasa aman, nyaman, dan sejahtera par samua warga Kota Ambon.
Bodewin sampekan pasang itu di dalang Perayaan Kajadiang Relawan Beta Par Ambon di rumah kadiaman, kawasan Karpan, Ambon, Salasa (30/12/2025).
Di hadapan para relawan, Bodewin sampekan apresiasi deng danke banya par parjuangan kolektif yang antar Bodewin dan Ely Toisuta pimpin memimpin Kota Ambon.
“Jabatan yang katong emban ini, hasil karja karas relawan. Tagal itu, Kajadiang ini bukang sakadar parayaan, mar momentum par biking teguh komitmen katong bakerja par rakyat,” tegas Wattimena.
Mengacu pada tema Kajadiang “Kristus Menghadirkan Damai Sejahtera bagi Semua”, Wattimena tekankan damai sejahtera seng boleh barenti sabage jargon, mar musti dapa rasa langsung dalang kahidopan masyarakat sahari-hari.
Manurut Bodewin, damai sejahtera tacarmin dar kondisi warga yang hidop sondor rasa takotang apa-apa, pung akses aer barsih, marasa aman di jalanang, deng nikmati fasilitas kota yang layak.
“Kalo masih ada warga kasulitan aer barsih, pemerentah wajib hadir. Kalo lampu jalang masih mati deng bikin orang seng aman, itu harus kas abis akang. Di situlah damai sejahtera dapa uji,” ujarnya.
Bodewin akui, upaya wujudkan kasajahteraan seng salalu bajalang gampang-gampang, lebe-lebe deng ada pamotongan transfer kepeng ka daerah. Maski bagitu, dia tegaskan komitmen Pemerentah Kota Ambon par tatap bagera dan realisasi janji-janji kampanye satu par satu.
“Katong sadar seng semua janji bisa bikin ganap sakaligus. Mar satu par satu samantara katong biking. Itu tanggong jawab moral katong par relawan dan saluruh warga kota,” katanya.
Bodewin juga biking inga, relawan pung peran strategis, seng cuma sabage pandukung politik, mar juga sabage pangawal kabijakan par pemerentah tetap bakarja iko harapan masyarakat.
“Relawan jang cuma bangga parnah barjuang. Relawan musti barani kawal, biking inga, deng pastikan pemerentah tetap batimbang par rakyat,” tandasnya.
Dalang kasampatan itu, Bodewin bilang, sajumlah program prioritas Pemerentah Kota Ambon, macang bedah rumah, bantuan UMKM, deng barbage program sosial laeng yang samantara tarus bajalang par kas kuat kaadilan sosial deng kasajahteraan warga, tarmasuk relawan.
Sabage wujud kapedulian di momen Natal, Pemerentah Kota Ambon juga bage-bage paket sembako par relawan Beta Par Ambon yang hadir.
Ketua Panitia Perayaan Kajadiang Relawan Beta Par Ambon Polly Nikijuluw sampekan banya dankne par Wali Kota deng keluarga yang su buka pintu rumah kadiaman par bisa biking parayaan Kajadiang barsama.
“Natal ini ajarkan katong bahwa kabarsamaan deng pangabdian itu kakuatan utama par bangong Ambon,” ujar Nikijuluw. (keket)
