AmbonVibes.com — Anggota DPRD Provinsi Maluku Rimaniar J. Hetharia, soroti parsoalan krisis aer barsih, ancaman banjer deng tanah longsor yang kerap kana kawasan Gunung Nona, Kecamatan Nusaniwe, Kota Ambon. Dia nilai, parsoalan itu su paleng mandasak deng butuh langkah konkret dar Pemerentah Provinsi Maluku dengPemerentah Kota Ambon.
Manurut Rimaniar, kabutuhan aer barsih marupakan parsoalan fundamental yang sampe oras ini balong dapa hendel bae-bae . Sumber Aer barsih yang kurang-kurang biking warga Gunung Nona musti karja karas par dapa dong pung kabutuhan aer barsih, lebe-lebel kalo pas musim kamarau.
“Masalah aer barsih ini sangat urgent deng seng bisa tunda lai. Pemerentah provinsi deng pemerentah kota musti lakas ambe langkah nyata deng cara bangong jarengang aer barsih deng cari sumber aer baru,” ujar Rimaniar waktu dapa hubungi dar Ambon, Minggu (21/12/2025).
Salaeng parsoalan Aer barsih, Rimaniar ada taruh parhatiang basar par isu kabancanaan di kawasan Gunung Nona. Dia bilang, wilayah itu maso rawan banjer dan tanah longsor, tarutama saat curah ujan tinggi, jadi akang paleng bahaya par warga pung kasalamatan.
Dia harap pemerentah lakas biking survei teknis di titik-titik rawan bencana, sakaligus susong parancanaan pambangunan infrastruktur pqnanggulangan yang mamadai.
“Deng survei yang komprehensif, pemerentah bisa rancang infrastruktur pananggulangan banjir deng longsor sacara tapat, macang talud panahan tanah deng sistem drainase yang bae. Ini panting par kase kurang risiko deng lindungi warga,” tegasnya.
Sabage wakil rakyat, Rimaniar bilang dia pung komitmen par tarus parjuangkan aspirasi masyarakat Gunung Nona malalui lambaga legislatif. Dia janji mo bawa samua parsoalan itu ka forum DPRD Provinsi Maluku par dapa parhatian deng ada tindak lanjut yang sarius.
“Beta pung tekad mo tarus parjuangkan kabutuhan warga Gunung Nona deng kawal akang di DPRD Provinsi Maluku, par ada solusi nyata yang banar-banar masyarakat dapa rasa,” ujarnya.
Sabalong ini, Rimaniar ada biking kagiatang reses deng warga RT 07 dan RT 08/RW 07 di kawasan Gunung Nona, Sabtu (20/12/2025). Dalang partemuan itu, warga rame-rame sampekan dong pung aspirasi.
Isu paleng mandesak yang muncol itu krisis aer barsih yang su paleng lama ada di sana. Salaeng itu, padagang kacil minta bantuan modal usaha, samantara yang laeng bicara soal banjer deng longsor kalo ujang basar.
Kaluhan laeng yang juga warga sampekan itu kondisi rumah seng layak huni Deng kabutuhan septic tank par dukung usaha peternakan warga.
Malalui reses, Rimaniar tegaskan mo rangkum samua aspirasi masyarakat par bisa dia parjuangkan malalui mekanisme parancanaan dan panganggaran di tingkat provinsi. Dia harap sinergi antara pemerentah deng masyarakat bisa hadirkan solusi barkalanjutan par parsoalan mandasar di kawasan Gunung Nona. (red)
