AmbonVibes.com — Angka kasus HIV di Maluku su tamba lebe banya. Akang jadi alarm serius par Pemerentah Provinsi Maluku. Gubernur Maluku Hendrik Lewerissa tegaskan, seng boleh ada diskriminasi dalang bentuk apa pun terhadap Orang Dengan HIV/AIDS (ODHA), juga dalang layanan transportasi laut deng udara, par maso parayaan Kajadiang 2025 deng Tambaru 2026.
Gubernur Hendrik bilang akang waktu coffee morning deng tema “Kesiapan Pemerintah Provinsi Maluku Menjelang Natal dan Tahun Baru” di Kantor Gubernur Maluku, Rabu (17/12/2025).
Gubernur ungkapkan rasa prihatin deng data paleng baru dar Komisi Penanggulangan AIDS (KPA) Maluku. Dar data itu, dapa tau rasio kasus HIV di Maluku akang tinggi kalo banding deng jumlah panduduk.
Bardasarkan data itu, jumlah kasus aktif HIV di Malukubsu sampe angka sakitar 6.000 orang dar total populasi kurang lebe 1,9 juta jiwa. Angka ini biking kuatir deng parlu pananganan sarius deng terpadu lintas sektor.
“Ini fakta yang biking takajo deng seng boleh tutu-tutu. Katong musti jujur lia akang,” ujar Gubernur.
Maski bagiru, Gubernur tegaskan, stigma deng pengucilan par ODHA justru jadi ancaman yang lebe barbahaya tagal bisa hambat upaya pananganan deng biking pengidap barat hati par akses layanan kesehatan.
“Yang sering kali lebe biking mati dar virus adalah stigma. Stigma cuma par biking keadaan jadi seng bae” katanya.
Gubernur tekankan, HIV seng manular lewat sentuhan fisik, makang sama-sama, deng interaksi harhari. Tagal itu sagala bentuk pangucilan par ODHA akang kaliru, juga seng pas deng nilai kamanusiaan serta hak asasi manusia.
“Pangucilan itu bantuk katidaktauan. Negara musti badiri lawang akang,” tegasnya.
Gubernur Hendrik juga sorot fakta HIV seng salalu takait kalakuang tartentu. Dalang banya kasus, parangpuang deng ibu rumah tangga justru jadi korban panularan dar pasangan.
“Ini bukang sakadar isu kesehatan. Ini soal kaadilan deng kamanusiaan. Pemerentah musti badiri di pihak korban,” ujarnya.
Untuk tekan laju panularan HIV, Pemerentah Provinsi Maluku mo biking kuat edukasi publik deng kampanye pancegahan, khususnya manyasar generasi muda.
Program edukasi, manurut rencana, mo jangkau ana skola SMP deng SMA agar pahami risiko, cara panularan HIV, deng penting paskali hidop sehat dan bertanggung jawab.
“Katong seng bisa atasi masalah ini deng diam atau maeng hakim. Edukasi itu kunci pancegahan,” pungkas Lewerissa. (Keket)
