AmbonVibes.com – Pemerintah Kota Ambon tegaskan komitmen par biking kuat kualitas pendidikan madrasah malalui dukungan langsung par kagiatang Expo Madrasah Tsanawiyah Negeri (MTsN) Ambon ke-9 Taong 2025. Kagiatang ini bajalang di lingkungan MTsN Ambon, Kamis (11/12/2025).
Expo ini kase muncul macang-macang inovasi deng kreasi siswa sabage bantuk aktualisasi bakat deng potensi ana skola.
Wakil Wali Kota Ambon Ely Toisutta pi buka expo. Ely paleng apresiasi samua yang su karja par expo ini bisa jalang deng bae.
“Atas nama Pemkot Ambon, Beta ucap apresiasi deng danke banya-banya par kepala madrasah, panitia, dan guru yang su ambe inisiatif deng karja karas par biking expo yang luar biasa ini,” ujarnya.
Ely tekankan, expo bukang sakadar pameran, malaengkan ruang strategis par dorong kreativitas dan kompetensi ana skola. Manurut Ely, MTsN Ambon pung peran sentral dalang mambantuk generasi panerus bangsa malalui pendidikan yang integrasikan ilmu kaagamaan deng pangatahuan umum dan teknologi.
“Madrasah banar-banar tanamkan etika deng moral yang kuat. Inilah kunci yang biking ana skola yang pung iman, takwa, adaptif, skaligus pung prestasi,” tegas Wawali.
Pemkot Ambon tegaskan dukung apa yang madrasah biking, sabage bageang dar upaya biking kota ini jadi pusat paradaban modern yang religius deng multikultural. Ely ajak siswa par pake expo par jadi panggung aktualisasi diri.
“Expo ini panggung par kamorang. Kas unju bahwa MTs Negeri Ambon itu tampa lahir ulama, ilmuwan, seniman, deng pemimpin masa depan yang pung akhlak mulia,” kata Wawali.
Lebe jao, Wawali harap expo ini batumbuh deng kambang jadi agenda saban taong, yang lebe basar dan kas Iko lebe banya skolah atau madrasah di Ambon.
Ely juga Ia juga tekankan, paleng panting itu karja sama deng kolaborasi par kase tambah nae citra deng kualitas MTs, sahingga madrasah di kota ini manjadi pilihan utama orang tua dan lahirkan generasi emas. (Keket)
