AmbonVibes.com – Pemerintah Provinsi Maluku kumbali tegaskan komitmen biking kuat tata kelola pemerentahan yang barsih, transparan, deng bebas dar baku tatoki kepentingan.
Gubernur Maluku Hendrik Lewerissa bilang akang pas abis acara Tekeng Internal Audit Charter deng Sosialisasi Pencegahan Benturan Kepentingan di Kantor Gubernur Maluku, Senin (25/11/25).
Waktu dapa wawancara dar awak media, Gubernur jelaskan Internal Audit Charter jadi landasan penting par Aparat Pengawasan Intern Pemerentah (APIP) par pastikan tata kelola keuangan daerah bajalang ikon atorang. Dokumen itu, kata Gubernur, akang jadi acuan par kontrol internal lebe taukur deng efektif.
“Penetapan internal audit charter deng sosialisasi benturan kepentingan ini, akang bageang dar upaya katong biking bae tata kelola kauangan. Katong inging administrasi bajalang rapi, transparan, deng akuntabel,” ujarnya.
Gubernur tambahkan, Pemprov Maluku usaha par kas angka skor deng indikator penilaian dari lembaga pengawasan macang KPK, BPK, dan BPKP. Akang jadi target penting par dorong kinerja pengelolaan keuangan daerah yang lebe disiplin.
“Katong dapa tuntut penuhi standar penilaian dar KPK, BPK, dan BPKP. Tagal itu, samua perangkat daerah musti karja lebe disiplin deng patuhi atorang,” tegasnya.
Gubernur juga bilang, penting paskali par cegah kepentingan baku tatoki di lingkungan birokrasi. Menurut Dia, integritas aparatur jadi pondasi utama par ciptakan pemerintahan yang publik parcaya.
“Beta inging citra Pemerentah Provinsi Maluku tamba lebe bae. Seng bolah ada tatoki kapentingan. Aparatur musti karja profesional deng jaga integritas,” kata Gubernur.
Hendrik bilang, kagiatan ini bukang cuma formalitas, mar biking inga skaligus motivasi par aparatur par paham dong pung rol pa dorong pemerentahan yang barsih.
“Akang pung inti, kagiatan ini par dorong aparatur karja lebe bae, lebe tartib, dan manghindar dar sagala macang palanggaran etika deng atorang,” tutupnya.
Deng langkah-langkah ini, Pemprov Maluku harap reformasi birokrasi tarus tamba lebe kuat, deng kaparcayaan publik par kinerja pemerentahan daerah lebe nae. (Keket)
