AmbonVibes.com – Badan Usaha Milik Daerah (BUMD) di Maluku dapat kritik tajam. Ketua DPRD Maluku Benhur Watubun nilai BUMD balong mampu kase kontribusi yang nyata par Pendapatan Asli Daerah (PAD). Jadi, parlu lakas reformasi samua-samua.
“Katong seng bisa tolerir kondisi BUMD yang cuma bajalang di tampa, bahkan rugi. Katong pung PAD sangat tagantong kinerja BUMD, padahal dong pung kontribusi masih jao dar harapan,” tegas Benhur, di Balai Rakyat Karpan, Ambon, Senin (24/11/2025).
Sorotan utama DPRD tertuju ka Dok Wayame, yang selama ini cuma stor kepeng sakitar Rp500 juta par PAD. Menurut Benhur, kondisi ini ironis karena pengelola BUMD justru dong duga nikmati keuntungan pribadi yang seng sebanding.
“Ini paleng seng adil dan seng bisa kas biar akang. Katong musti audit investigasi menyeluruh. Kalo dapa bukti ada penyimpangan, musti tindak tegas,” ujarnya.
Benhur tegaskan, par biking bae kinerja Dok Wayame musti deng rombak manajemen secara total dan transformasi model bisnis yang lebe profesional dan transparan. Pengawasan ketat dar pihak independen juga dia anggap penting par pastikan BUMD bajalang bae sesuai tujuan.
Selain Dok Wayame, DPRD juga soroti PD Panca Karya dan PT Bank Maluku dan Maluku Utara (Malut). PD Panca Karya dia minta optimalkan samua unit usaha par kase kontribusi lebe basar par PAD. Sedangkan Bank Maluku musti tekan biaya operasional dan kase capat digitalisasi perbankan.
“Bank Maluku musti pacu digitalisasi par biking basar sumber pendapatan baru. Model bisnis konvensional su katinggalan zaman,” jelas Benhur.
DPRD Provinsi Maluku janji kawal reformasi BUMD secara intensif, termasuk bentuk tim khusus par evaluasi kinerja. Benhur ancam, par direksi BUMD yang seng unju dia pung kemajuan.
“Katong mo pangge samua direksi BUMD par mintai keterangan. Kalo seng ada kemajuan nyata, katong seng segan rekomendasi par ganti direksi,” katanya.
Dengan reformasi manyaluruh, Benhur harap BUMD jadi motor penggerak perekonomian daerah dan sumber PAD yang handal.
“Katong parlu BUMD profesional, transparan, dan akuntabel. BUMD musti jadi sumber pendapatan daerah, bukan beban,” pungkasnya. (Keket)
