AmbonVibes.com – Dessy Halauw dapa lantik jadi Katua Dewan Pimpinan Cabang (Depicab) Sentral Organisasi Karyawan Swadiri Indonesia (SOKSI) Kota Ambon par masa bakti 2025–2030. Pelantikan pas di tengah Musyawarah Cabang (Muscab) ke-24 SOKSI Kota Ambon, Senin (10/11/2025).
Dessy Halauw waktu sampekan sambutan, langsung kase apresiasi par samua yang su karja karas sampe Muscab dan pelantikan pengurus baru bisa bajalang deng bae. Secara khusus, apresiasi juga par Katua Depidar SOKSI Provinsi Maluku R. Boy Sangadji yang banya kase motivasi.
“Danke banyak beta sampekan par Katua Depidar SOKSI Provinsi Maluku Pak Boy Sangadji, yang tarus-tarus dukung dan dorong Beta par tetap samangat. Jadi bukti oras ini, katong semua seng biking RBS malu,” ujar Dessy biking samua kader tatawa.
Dessy juga kase penghargaan par Ketua SOKSI yang baru turung, Pak Awang, yang hadir deng kase dukungan. Sebagai katua yang baru, Dessy bilang, amanah yang samua kase par dia, akang jadi tanggungjawab basar yang tantu dia jaga deng bae. Menurut dia, pelantikan bukang akhir, mar awal karja karas par biking basar SOKSI di Kota Ambon.
“Katong su abis Muscab lalu sakarang su dapa lantik jadi pengurus SOKSI Kota Ambon. Katong pung karja seng brenti di sini. Katong musti solid deng tarus barsatu par biking basar SOKSI di Ambon,” tegas Dessy.
Dessy juga bilang penting paskali par SOKSI sinergi deng Pemkot Ambon par biking program sosial dan pengabdian masyarakat, yang jadi ciri khas SOKSI. Dia harap lai, pengurus baru bisa “manyala” dan hadir nyata di tengah masyarakat.
“Katong pung tanggung jawab ka muka itu sinergi deng Pemerintah Kota Ambon. Bagemana katong bikin SOKSI menyala dalang masyarakat,” ujarnya. (red)
