AmbonVibes.com – BKPSDM Pemerintah Kota Ambon biking seleksi tabuka Jabatan Pimpinan Tinggi Pratama (JPTP) yang kosong. Wakil Wali Kota Ambon Ely Toisutta buka akang acara ini di Golden Palace Hotel Ambon, Selasa (11/11/2025).
Seleksi tabuka ini bageang dar program prioritas Pemkot Ambon, yakni Penataan Birokrasi yang kapabel, handal, dan barsih dar korupsi-kolusi-nepotisme (KKN). Toisutta jelaskan, kegiatan ini par isi tujuh jabatan pimpinan tinggi pratama tagal pejabat definitif maso pansiong deng ada penyetaraan birokrasi.
“Posisi kosong ini bageang dar penyetaraan birokrasi lewat jobfit yang su kamuka, deng ada pejabat yang su maso masa pansiong. Jadi parlu ada seleksi ini,” ujar Toisutta.
Tujuh jabatan yang kosong oras ini adalah:
Kepala Dinas Koperasi dan UKM
Kepala Dinas Perpustakaan
Kepala Dinas Perindustrian dan Perdagangan
Sekretaris DPRD Kota Ambon
Kepala Badan Penanggulangan Bencana Daerah
Kepala Dinas Perikanan
Kepala Dinas Kesehatan
Ely bilang lai kalo seleksi ini akang iko regulasi yang ada, macang UU Nomor 20 Tahun 2023 tentang ASN, PP Nomor 17 Tahun 2020, deg Permenpan RB Nomor 17 Tahun 2019 tentang pengisian JPTP secara terbuka dan kompetitif.
Toisutta juga minta 19 peserta seleksi par iko samua tahap deng bae. Ia tekankan, tim assessor deng panitia seleksi nanti nilai dong secara objektif dar makalah, presentasi, wawancara, deng indikator laeng yang relevan.
“Tugas assessor kase nilai potensi deng kompetensi peserta iko parameter, sedangkan panitia nilai lanjutan melalui makalah, presentasi, deng wawancara. Samua par biking pasti, pemimpin yang dapa pilih memang batul-batul kompeten,” pungkas Wakil Wali Kota Ambon. (Piere)
