AmbonVibes.com – BMKG lewat Stasiun Meteorologi Pattimura Ambon bar kas inga tempo-tempo soal wer tarbae di Maluku par tanggal 15–21 September 2025.
Menurut BMKG, ujang basar sampe lebat bisa turung di beberapa tampa kaya Kota Ambon, Buru, Buru Selatan, Maluku Tengah, Seram Bagian Barat, Seram Bagian Timur, sampe Kepulauan Aru. Ujang jua bisa sama-sama deng guntur kilat deng anging kancang tempo pende.
Kanapa Bisa Wer Tarbae?
Kepala Stasiun Meteorologi Pattimura Kamari bilang, kondisi ini dipicu oleh bibit siklon 98W di Laut Filipina Timur. Siklon ini biking anging tabelok dan massa udara basah di Maluku takumpul.
“Katong pung laut juga ada hangat, suhunya 26–29℃. Itu bikin uap air banya nae, tarus jadi awan-awan ujang. Baru tambah kondisi atmosfer labil, jadi gampang paskali jadi awan petir,” jelas Kamari, Minggu (14/9/2025).
Potensi Bencana yang Bisa Terjadi
BMKG bilang masyarakat haros ati-ati tagal kondisi ini bisa picu bencana banjir, tanah longsor, pohong rubuh, sampe gelombang tinggi.
“Ujang basar sampe sangat basar bisa disertai kilat guntur deng anging kancang. Akang pung dampak bisa biking jarak pandang terbatas dan muncul bencana hidrometeorologi,” tambah Kamari.
Pesan Buat Warga Maluku
BMKG minta warga selalu waspada, apala yang tinggal di daerah rawan banjir deng longsor. Nelayan juga diminta ati-ati kalo mo pi laut, karena potensi gelombang tinggi bisa muncul kapan saja. (red)
