AmbonVibes.com – Tiga Nyong Ambon gagah-gagah, jago musik, vokal bagus. Dong pung nama Apriliano Kainama, Johen Siwalette, deng Rinto Far-Far. Su dar taong 2022, dong tiga kas badiri band, pake nama “Given”.
Orang Ambon saparuh su parnah lia dong nae panggung di dua-tiga acara. Given kalo nae, dong biasa bawa dong pung lagu sandiri, atau bawa penyanyi luar pung lagu. Bagitu donci babunyi, bisa tau anana Given sangaja maso di aliran pop-rock alternatif.
Nah, kabar bae datang dar Given. Har Salasa, 9 September ini, dong kas kaluar extended play (EP). EP itu bukang pono-pono, lebe sapuluh lagu. Mar EP juga bukang satu lagu areng-areng. Orang musik biasa bilang akang album mini.
Sapa-sapa yang suka Given, suka aliran musik pop-rock alternatif, atau memang fanatik sagala macang musik, langsung klik jua di kanal-kanal khusus yang biasa siar musik digital.
Given pung album mini akang judul Dream Love Life. Bahasa Engres memang. Akang pung terjemahan, Mimpi, Cinta, Kahidupan.
Album mini ini berisi lima lagu pilihan karya mereka sendiri sejak akhir 2022 hingga 2025.
Lagu-lagunya adalah Carry On, Run or Hide, Stone Heart, Girl with Interesting Face, dan The Reason
Given ada bikin siaran pers par wartawan-wartawan. Dong bilang, dalang album mini, ada lima lagu. Samua lagu pake Bahasa Engres, Given Apriliano Kainama yang karang akang.
Di luar biking lagu, Apriliano yang manyanyi akang. Dia memang vokalis Given. Tamang dua, Johen Siwalette pegang gitar, deng Rinto Far-Far pegang bass.
Biasa musisi di mana-mana batamang di atas panggung sampe luar panggung. Jadi, untuk biking album mini macang Dream Love Life, dong kele tamang-tamang par kas tamba kuat dong pung musik.
Pemain bass Rinto Far-Far yang sakarang rangkap manajer bilang, tamang-tamang yang biking kuat Given pung musik itu Mckhen Leinussa, Nur Solaeta, Roland de Fretes, deng satu lae Endy Diasz.
Kamuka, Given parna kas kaluar dong pung lagu Never Be The Same deng Obsessed, taong 2022. Jadi, dar cuma lagu sa, oras ini akang nae jadi album ini.
“Katong mo kas luas katong pung jalang musik karya yang lebe bae. Katong mo kase reflesi soal mimpi, cinta, dan kehidupan yang katong jalani, bae orang pribadi, bae dalang band,” Given tulis bagitu.
Given ada tambah lae, album mini Dream Love Life akang jadi tanda par Given tagal dong lahir dari samangat biking karya di tanah Ambon.
Given taruh harap, orang banya bisa dapa dong pugng musik, dan lebe lae, bisa jadi sumbangan par musik Indonesia. (Opa)
