AmbonVibes.com – Lapangan Merdeka jadi saksi pesta hari jadi ka-450 Kota Ambon, Senin (8/9/2025). Ribuan orang datang: pejabat sipil, militer, tokoh adat, sampe orang biasa.
Dalam sambutan, Gubernur Maluku Hendrik Lewerissa bilang, tema “Bagara Sama-Sama Par Ambon, Maluku, Deng Indonesia Pung Bae” jang cuma jadi slogan manis, mar musti hidup dalam tindakan nyata.
Kritik Padis Mar Ajak Membangun
Gubernur bilang identitas “Beta Par Ambon” itu harus kantara dar kalakuang harhari.
“Jang bilang Beta Par Ambon kalo masih buang sampah sabarang tampa, parkir sabarnang, atau suka langgar aturan. ASN jang mangaku Beta Par Ambon kalo datang kantor lat-lat, lalu lebe banya dudu-dudu di rumah kopi darpada karja. Ana skolah jang bilang Beta Par Ambon kalo tahang Deng pamalas balajar atau suka bakalae jalang,” tegas Lewerissa.
Ia cubi masalah klasik Ambon yang sampe oras blong kelar: sampah, air bersih, macet, layanan kesehatan, pendidikan.
“Ibarat lidi, kalo satu-satu seng bisa barsih. Harus Ika akang jadi sapu baru kuat,” tambahnya.
Pela Gandong: Ale Rasa Beta Rasa
Lewerissa kas inga lae soal nilai budaya Pela-Gandong yang jadi roh orang Ambon.
“Ale rasa beta rasa, potong di kuku rasa di daging – itu yang harus tetap jadi dasar hidup orang Ambon,” katanya.
Ia lanjut, Ambon itu Maluku pung kaca muka. Kalo Ambon manis – Maluku juga manis, Kalo Ambon barsi – Maluku iko barsi. Mar kalo Ambon kotor, nama Maluku juga ancorlele lai.
Jang Lala Biking Ambon Manis
Di ujung sambutan, Gubernur kutip pesan Bung Karno soal dunia yang damai dan pono persaudaraan. Dia ajak samua orang karja par Ambon, Maluku, dan Indonesia.
“Jang lala biking bae Ambon, jang parnah brenti biking manis Ambon. Inga semangat Lawamena Haulala, dan jang lupa sumbayang par Ambon,” serunya.
Lewerissa tutup dengan harapan: “Atas nama pemerintah dan masyarakat Maluku, beta ucap salamat hari jadi ka-450 par Kota Ambon. Tuhan berkati Ambon supaya selalu pono cinta deng rasa dame.” (Piere)
