AmbonVibes.com – Anana muda dari rupa-rupa organisasi pemuda dan mahasiswa turung jalan biking demo di muka Kantor DPRD Maluku, Senin (1/9/2025). Massa KNPI Maluku, Cipayung Plus, sampe BEM Nusantara (BEMNU) Maluku baku gabung, dong pi bawa bandera, poster, sampe spanduk par protes pemerintah pung karja-karja.
Ada yang bawa bandera merah putih, mar ada lae yang biking heboh. Dong jua ada bawa bendera itang gambar tengkorak. Samua su tau itu bandera One Piece. Bandera itu iko nae dalang barisan pemuda deng mahasiswa.
“Katong datang par kase maso katong pung aspirasi,” salah satu orator toa, bataria bagitu.
Dari Tertib Jadi Ricuh
Demo ini, kamuka-kamuka akang bajalang bae-bae, aman-aman sa. Mar suasana mulai panas waktu dua kelompok mahasiswa baku sindir.
Dari yang wartawan lia, ada kelompok yang asek orasi bilang dong pung perjuangan itu murni par demokrasi. Eh, kage lae, ada yang balas baterek.
Dari situ langsung kaco. Mulai dari baku lempar botol air mineral, kayu, deng ban bekas motor iko malayang.
“Kamuka itu, cuma baku adu mulu. Mar kage lae su baku lempar,” salah satu saksi mata carita bagitu.
TNI-Polri Turun Tangan
TNI-Polri yang dari muka lae su baku jaga di sana, langsung campor tangan. Dong ada repot sadiki lae, soalnya masa banya. Susa par kase pisa.
Tagal dong talalu baribot, orang-orang mulai panik, termasuk beberapa staf dan anggota DPRD Maluku yang ada di tengah-tengah massa yang kaco.
Polisi deng tentara terpaksa evakuasi para legislator masuk kumbali ka dalang gedung DPRD par jaga-jaga jang sampe suasana berubah jadi seng bae . Untung bae, polisi deng tentara akhirnya bisa kase pisa dua kelompok, jadi situasi tenang kumbali.
Sebelum pigi di DPRD Maluku, massa su pi lebe dulu di Markas Polda Maluku. Di sana, Kapolda Maluku Dadang Hartanto turung langsung tarima demonstran. Antua seng pake spasi, langsung duduk slep di tanah, di tengah demonstran.
Kapolda bilang, antua paleng sayang Maluku. Demonstran langsung hura, tagal sanang dapa sayang dari Kapolda. Bahkan, Kapolda Dadang jua ada bilang, pasti kawal aspirasi mahasiswa, sesuai polisi pung kewenangan. (Leo)
