AmbonVibes.com, Ambon – Seniman sekaligus dosen IAKN Ambon Nelsano Anesry Latupeirissa, biking orang-orang bulu badang badiri. Samua tapaku lia pertunjukan seni lintas media, deng akang tajuk “Sumpah Batu”. Acara ini dong biking di Teater Tertutup Taman Budaya Provinsi Maluku, Rabu (27/8/2025).
Latupeirissa oras ini ada ambe studi Doktoral di ISI Yogyakarta hadir di taman budaya bukang cuma par jadi pengarah kreatif mar juga penggerak utama pertunjukan.
Su bagitu, ada koreografer Victor Alfa Saapang yang punya bageang lae, penonton dapa bawa molo ka dalam carita budaya Maluku yang dapa gabung deng inovasi modern.
Batu Sebagai Simbol Kuat
Dong pake musik batu-batu, tabuhan tifa, tari mahasiswa IAKN Ambon, deng narasi visual digital, pertunjukan ini kas unju simbol batu pung kakuatang dalang hidop orang Maluku.
Inspirasinya datang dari mitos “Sumpah Batu” di Negeri Aboru (Hatu Apua), sebuah sumpah adat yang biking taika ampa negeri: Aboru, Booy, Kariu, deng Hualoy.
“Pertunjukan ini ada tiga bagieang. Pertama, fenomena batu dalang harhari masyarakat. Kedua, batu dalang budaya Maluku. Dan palaeng laste , carita ‘Hatu Apua’, ini carita ampa negeri dong jadi satu kumbali tagal angka sumpah itu,” jelas Latupeirissa.
Apresiasi dari Kampus
Wakil Rektor Bidang Kemahasiswaan IAKN Ambon Branckly Egbert Picanussa, ada hadir deng buka acara. Ontua kase apresiasi tinggi par karya ini.
“Hari ini katong lia satu karya fenomenal. Latupeirissa bukang cuma biking karya par disertasinya, mar juga karja karas biking budaya Maluku tampil deng wajah baru. Harapan ka muka, lebe banya budaya Maluku laeng bisa kase nae ka panggung par banya orang,” ujar Picanussa.
Tradisi & Inovasi Jadi Satu
Dengan kase maso musik tradisional, eksperimen bunyi, tari, dan teknologi digital, pertunjukan “Sumpah Batu” bawa penonton bukan cuma lia-lia, mar dapa rasa nilai budaya Maluku yang dalam.
“Beta terinspirasi dar hidop orang Maluku sandiri. Dar cara buru binatang di hutan, cara ekspresikan budaya, sampe carita sumpah adat yang bikin satu negeri-negeri. Itu semua jadi napas pertunjukan ini,” tambah Latupeirissa. (Leo)
