AmbonVibes.com – Katua Klasis GPM Kota Ambon Pandita Elrianton Muskitta kastau hasil monitoring deng evaluasi (monev) palayanan akang pung hasil positif. Panguatan umat dapa 80 persen, panguatan palayanan 75 persen, deng panguatan kalambagaan gareja 78 persen.
“Capean ini bisa jadi tagal katong pung komintmen par panggelan palayanan barsama,” kata Katua Klasis waktu sampekan pidato pambukaan Sidang ka-50 Klasis GPM Kota Ambon di Gereja Joseph Kam Jemaat Bethel, Minggu (8/3/2026).
Sajumlah orang basar ada datang iko Pambukaan Sidang ke-50 Klasis GPM Kota Ambon. Ada Wakil Sekretaris Umum Majelis Pekerja Harian Sinode GPM Pendeta Max Takaria, Asisten Administrasi Umum Sekda Maluku Dominggus N. Kaya, Wali Kota Ambon Bodewin Wattimena, Katua DPRD Kota Ambon Morits Tamaela, deng delegasi 21 jemaat.
Pandita Elrianton Muskitta mangaku, salaeng ada hasil positif, masih ada bidang palayanan yang parlu pas dapa kas kuat tarutama palayanan sosial, pandidikan, advokasi, deng pambardayaan ekonomi umat.
Tagal itu, kata Pandita Elrianton Muskitta, klasis su biking dokumen Rencana Pangambangan Palayanan Klasis (RPPK) GPM Kota Ambon Taong 2026–2030 sabage arah palayanan lima taong ka muka.
“Dalang dokumen itu, katong rindu lia umat batumbu dalang iman deng karakter etis injili, palayan yang pung integritas dan spiritualitas kuat, serta lambaga gareja tadudu bae-bae deng transparan,” jelas Pandita Elrianton.
Pandita Elrianton managaskan, parsidangan gareja bukang sakadar agenda organisasi yang su dapa ator dalang tata gareja deng paraturan pokok tentang klasis. Lebe dar itu, sidang gareja marupakan panggilan iman par kas jalang misi Allah di tengah kahidupan umat.
“Ada doa, ada harapan, ada tanggung jawab, dan ada panggilan yang tarus biking akang jadi baru. Kahadiran katong bukang cuma par bawa tanggapan tarhadap laporan umum palayanan, manyusun program, anggaran, deng sajumlah rekomendasi, mar katong bawa pargumulan umat yang katong layani,” ungkap Pandita Elrianton.
Manurut Pandita, palayan-palayan gareja bakumpul di tengah dinamika masyarakat Kota Ambon yang tarus barubah, mulai dar parsoalan kaluarga yang tamba lebe kompleks, tantangan ganerasi muda, parkambangan teknologi yang pesat, sampe barbagai parsoalan sosial yang tamba nyata dalang kahidupan umat.
Pandita Elrianton tegaskan, sidang klasis ka-50 harus jadi momentum par biking evaluasi palayanan deng ecara jujur. Evaluasi itu bukang par cari sapa yang salah, mar par lia sajauh mana palayanan gareja banar-banar baku sonto deng kahidupan umat.
“Katong seng bisa tutu mata tarhadap barbage parsoalan yang tarjadi di tengah masyarakat. Ada orang cere, salingkuh, kakarasang dalang rumah tangga, jeritan pinjaman online, judi online, deng barbage karentanan sosial laeng, tarmasuk krisis pambinaan karakter anana,” ungkap Pandita Elrianton.
Dia juga bilang, panting paskali gereja taruh parhatian tarhadap palayanan anana, tarmasuk ana yang pung kabutuhan khusus, deng anan yang hidop dalang konteks lintas iman.
Manurut dia, palayanan kapada anana marupakan investasi strategis par gareja pung hari eso, sakaligus par bisa kas hadir generasi emas GPM dan Indonesia.
“Kalo seng biking palayanan par anana maka katong nanti kahilangan esensi panggilan. Tanggong jawab mambangun generasi yang cerdas dan pung akhlak mulia mulai deng biking maksimal paran kaluarga,” tegas Pandita Elrianton.
Pandita kastau, di Klasis GPM Kota Ambon ada 53 pendeta, 784 penatua deng diaken yang malayani di 21 jamaat, 143 sektor, deng 360 unit palayanan.
Palayan-palayan gareja, kata dia, dapa pangge jadi taladan par 11.291 kapala kaluarga ato sakitar 41.314 jiwa yang barada dalang lingkup palayanan Klasis Kota Ambon.
“Sikap katakunan dalang kasih Allah musti dapa lia akang dalang sikap hidup, etika palayanan, tutur kata, dan integritas kahidupan katong. Umat seng cuma dengar katong pung khotbah, mar juga baca kahidupan katong,” kata Pandita Elrianton.
Dia juga manyinggung sajumlah dinamika palayanan jamaat, antara laeng jumlah jamaat Diakonos barkurang deng ada pargumulan Jemaat Sion takait pangkajian pemekaran jemaat.
“Hal-hal macang ini parlu katong ambe sikap deng bijak par seng muncul parsoalan dalang kehidupan barsama. Ini jadi tugas barsama Majelis Pekerja Klasis dan Majelis Jemaat,” ujar Pandita Elrianton. (Piere)
