AmbonVibes.com – Anggota Komisi II DPRD Provinsi Maluku Anos Yeremias minta pemerentah dan pihak takait musti pastikan pasokan listrik di wilayah Maluku tetap stabil maso-maso Hari Raya Idul Fitri 1447 Hijriah.
Anos sampekan parmintaan itu tagal ada pamadaman listrik di Kota Ambon babarapa jam sabalong Rapat Dengar Pandapat (RDP) Gabungan Komisi II deng Komisi III DPRD Maluku, barsama mitra karja di Ruang Paripurna DPRD Maluku, Kamis (5/3/2026).
“Baru babarapa jam lalu lampu padam di ibu kota provinsi. Katong harap maso-maso H-3 Idul Fitri, samua su bale normal,” kata Anos par wartawan, Jumat (6/3/2026).
Sekretaris DPD Partai Golkar Maluku itu manilai, kalo pamadaman listrik masih tarjadi di Ambon sabage ibu kota provinsi, maka kondisi di wilayah kapulauan laeng jang sampe lebe sulit.
Manurut dia, stabilitas pasokan listrik di Ambon usti jadi prioritas tagal kota ini marupakan pusat pemerentahan deng aktivitas ekonomi di Maluku.
“Kalo di Ambon sa su macang bagini, bagemana di pulau-pulau,” ujar Anos.
Dia tegaskan, pemerintah dan pihak Perusahaan Listrik Negara (PLN) parlu pastikan kasiapan sistem kalistrikan par seng tarjadi gangguan tarus-tarus, tarutama maso-maso hari basar kaagamaan yang biasa taiko deng paningkatan kabutuhan listrik masyarakat.
Anos juga kas inga komitmen manajemen PLN yang kamuka bilang, tenga taong 2026 seng ada daerah deng layanan listrik tarbatas lai di Maluku.
Dia bilang, dalang rapat kamuka deng Komisi II DPRD Maluku, PLN rencana par apus pola palayanan listrik tarbatas, macang layanan anam jam ato 12 jam per hari, dan ganti deng layanan listrik 24 jam.
Salaeng itu, pemerentah pusat malalui Kamenterian Energi dan Sumber Daya Mineral (ESDM) juga su pung komitmen par biking program elektrifikasi negeri-negeri yang sampe oras ini balong dapa rasa listrik.
“Katong minta energi dan SDM perhatikan hal ini. Kalo su janji di muka DPRD, janji itu musti biking akang,” tegas Anos.
Anos harap barbage komitmen itu lakas biking nyata akang par masyarakat Maluku, lebe-lebe maso Idul Fitri, seng susah tagal kakurangan pasokan listrik. (Piere)
