AmbonVibes.com — Ada kabar burong yang bisi-bisi, Menteri Energi dan Sumber Daya Mineral (ESDM) Bahlil Lahadalia seng master deng Gubernur Maluku Hendrik Lewerissa. Gubernur mo baku dapa menteri, mar menteri seng nodek. Itu yang samantara rame.
Kabar itu tasiar capat dar mulu ka mulu, deng su ada di media sosial lai. Isu ini biking orang spekulasi, pemerentah pusat kurang kase parhatian par masalah strategis sektor energi, pertambangan, dan kelistrikan di Provinsi Maluku.
Mar kabar burong itu langsung dapa bantah dari Tenaga Ahli Menteri ESDM Umar Lessy. Umar bilang, dari kamuka lai waktu partama manjabat, Menteri Bahlil salalu buka ruang komunikasi deng samua kapala daerah, tarmasuk Gubernur Maluku.
“Pak Menteri salalu sadia waktu par baku dapa deng gubernur-gubernur. Seng batul kalo orang bilang ontua seng mo tarima Gubernur Maluku,” kata Umar Lessy kepada wartawan, Sabtu (10/1/2026).
Manurut Lessy, parsoalan yang tarjadi bukang panolakan, malaengkang panyasuean jadwal. Dia jelaskan, bae Menteri ESDM bae Gubernur Maluku sama-sama pung agenda padat jadi balong daa waktu yang pas par baku dapa langsung muka deng muka.
“Jumat 9 Januari kamareng sabanarnya su jadi agenda, cuma Pak Gubernur ada agenda laeng,” jelasnya.
Umar paleng manyasal bisa ada isu mudel bagini. Dia nilai, isu ini seng pung dasar, dan pung potensi biking kabor aer. Manurut Lessy, informasi macang itu bisa picu salahpaham antara pemerentah pusat deng daerah, sakaligus biking persepsi seng bae di tengah masyarakat.
“Kalau ada isu seperti ini, sebaiknya dikonfirmasi dulu. Jangan langsung dipercaya, apalagi disebarkan,” tegas Umar.
Lessy tambahkan, Kementerian ESDM tetap kase perhatian sarius par Maluku, tarutama dalang pangambangan energi terbarukan, panguatan infrastruktur kelistrikan, deng pengelolaan sumber daya mineral yang barkalanjutan.
Dia juga tegaskan, Menteri Bahlil pung komitmen kuat par pastikan daerah kapulauan rupa Maluku seng tatinggal dalang pambangunan sektor energi.
Manurut dia, barbage program sudah deng samantara kas siap par manjawab tantangan geografis deng katarbatasan infrastruktur di wilayah timur Indonesia.
“Maluku ini daerah strategis. Pak Menteri paleng paham tantangan daerah kapulauan. Tagal itu, panting ada komunikasi deng koordinasi antara pemerentah pusat deng daerah,” katanya.
Lessy tutup parnyataan deng sakali lagi bilang, yang paleng panting bukang isu, malaengkang komitmen substantif par Maluku pung kamajuan.
“Yang lebe panting komitmen nyata kita par kamajuan pembangunan Maluku, par laste-laste bisa kase faedah langsung par masyarakat Maluku,” pungkasnya. (red)
