AmbonVibes.com — Anggota DPRD Provinsi Maluku Anos Yeremias minta pemerentah pusat deng Pemerentah Provinsi Maluku lakas buka akses palayanan kapal parintis par ampa desa di Kacamatan Wetar Selatan, Kabupaten Maluku Barat Daya.
Ampa desa itu nama Desa Ilputi, Desa Masapun, Desa Mahuan, deng Desa Tomliapat. Sampe Taong Anggaran 2026, ampa desa ini balong maso dalang jarengang trayek kapal parintis, deng balong dapa palayanan transportasi laut reguler.
Manurut Anos, usul palayanan kapal parintis par ampa desa itu su dapa bahasa dalang Focus Group Discussion Dinas Perhubungan Provinsi Maluku taong 2024 dan ulang kumbali dapa bahas taong 2025. Mar akang usul balong dapa akomodasi dalang jaringan trayek kapal parintis Taong Anggaran 2026.
“Kondisi ini biking masyarakat Ilputi, Masapun, Mahuan, deng Tomliapat masih tarisolir. Padahal, par masyarakat kapulauan, transportasi laut bukang sakadar pilihan, malaengkang kabutuhan utama deng urat nadi kahidupan,” kata Anos.
Dia bilang, masyarakat dar ampa desa musti bajalang ka Ilwaki saban kali mo pake kapal perintis. Parjalanan sarupa juga musti dong biking kalo mo jamput kaluarga yang datang pake kapal.
Bardasarkan katarangan masyarakat, biaya transportasi dar desa manuju Ilwaki par sekali perjalanan bisa makang ongkis lebe dar Rp1 juta. Kalo musti pi lalu bale, akang pung biaya lebe basar.
“Biaya lebih dari satu juta rupiah par sakali jalang tantu paleng barat par masyarakat. Apalai kalo parjalanan tagal ada anggota kaluarga yang sakit, ibu hamil yang parlu partolongan, anak yang mo lanjut pandidikan, ato masyarakat yang harus mo urus barbage kaparluan,” ujar Anos.
Parsoalan akang transportasi juga bardampak tarhadap parekonomian masyarakat. Hasil partanian, parkebunan, deng parikanan sulit bawa kaluar desa, samantara bahan kabutuhan pokok musti bawa maso ka desa deng ongkos angkut yang tinggi.
Dalang bidang kasehatan, warga yang butuh pananganan medis lanjutan musti cari parahu atau speedboat par pi manuju Puskesmas ato rumah sakit. Salaeng parlu biaya basar, proses evakuasi juga tapargantung kondisi galombang deng angin.
Anos mangaku su dengar langsung barbage kaluhan Waktu pigi ka Desa Masapun dan Desa Mahuan dalam agenda kunjungan ka Kabupaten Maluku Barat Daya, September 2026.
“Masyarakat seng minta yang lebe-lebe. Dong cuma harap ada palayanan transportasi laut yang su pung jadwal, tajangkau, deng aman,” tegas Anos.
Anos sampekan, parsoalan deng aspirasi masyarakat Wetar Selatan su parnah dia sampekan par Komisi V DPR RI malalui Tenaga Ahli, Sherly Wattimena. Aspirasi itu juga su sampe ka Direktorat Jenderal Perhubungan Laut, Kementerian Perhubungan Republik Indonesia, par dapat parhatian deng tindak lanjut.
Salaeng par pemerentah pusat, Anos minta Dinas Perhubungan Provinsi Maluku tarus parjuangkan par Desa Ilputi, Masapun, Mahuan, dan Tomliapat bisa maso dalang jaringan trayek kapal parintis di taong anggaran barikut.
Dia juga mandorong kajian deng survei teknis tarhadap kabutuhan penumpang deng angkutan barang, kondisi fasilitas palabuhan ato titik sandar deng pola trayek yang bisa par malayani ampa desa.
Sambil manunggu panatapan trayek sacara parmanen, Anos minta pemerentah partimbangkan palayanan samentara malalui deviasi kapal parintis di palayaran tartantu, deng tetap parhatikan parsyaratan teknis, kasiapan fasilitas sandar dan kasalamatan palayaran.
Anos juga minta pemerietah kacamatan dan pemerintah desa biking siap dokumen administrasi deng data pandukung, maliputi jumlah panduduk, potensi panumpang, kabutuhan angkutan barang, hasil produksi masyarakat, kondisi fasilitas palabuhan, deng jarak mopun biaya parjalanan manuju palabuhan tardekat.
“Data pandukung musti biking siap akang par akang usul seng cuma tabrenti dalang pambahasan, mar batul-batul bisa dapa tarima dan dapa kas maso dalang jaringan trayek kapal parintis,” kata Anos.
Dia bilang deng tegas, mo tarus kawal aspirasi ini malalui Komisi V DPR RI, Direktorat Jenderal Perhubungan Laut, Dinas Perhubungan Provinsi Maluku, deng pihak-pihak tarkait.
“Parjuangan ini bukang cuma soal kapal yang datang deng pihi. Ini parjuangan par buka katarisolasian, kas kurang beban biaya hidop deng biking loas akses masyarakat tarhadap palayanan kasehatan, pendidikan dan ekonomi. Ilputi, Masapun, Mahuan, dan Tomliapat seng boleh tarus taisolir. Negara musti hadir malalui palayanan transportasi laut yang adil, aman, tajangkau, deng barkelanjutan,” tutup Anos. (Igo)
