AmbonVibes.com – Jalang raya yang rusak di Taeno Atas, Negeri Rumah Tiga, Kecamatan Teluk Ambon, akang su jadi bahan kaluhan warga kumbali. Soalnya akang jalang pung rusak parah skali sampe lewat di sana cukup susah, apalai musti bawa hasil kabong ka pusat Kota Ambon.
Warga Taeno dapa kasampatan par bilang akang par Anggota DPRD Provinsi Maluku Rovik Akbar Afifudin, waktu mangente lapangan sakaligus kumpol aspirasi masyarakat dalang agenda reses. Rovik bilang siap koordinasi deng Pemerintah Kota (Pemkot) Ambon par cari solusi atas persoalan tersebut.
Rovik manilai, karusakan jalang seng bisa lia cuma sabage parsoalan infrastruktur. Bagi orang Taeno Atas, akses jalang barkaitan langsung deng aktivitas harhari deng parputaran ekonomi, tarutama par warga yang pung pandapatan dar sektor partanian.
Manurut Rovik, pananganan ruas jalang di Taeno Atas parlu koordinasi antara pemerentah kota deng pemerintah provinsi, tagal akang pung kawenangan tabagi dua. Dia mo pi baku dapa Wali Kota Ambon par bicara pambagian pananganan akang ruas jalang par biking bae tahap per tahap.
“Infrastruktur jalang adalah kabutuhan vital par kasalamatan deng kalancaran ekonomi warga. Katong bisa bagi tugas, Pemkot Ambon karja dar arah bawah, dan beta mo parjuangkan anggaran pae kawasan parmukiman malalui APBD Provinsi,” jelas Rovik.
Manurut dia, pola pambagian tugas itu parlu paskali par akang rehab jalang seng musti tunggu saluruh ruas jalang dapa biking sakaligus.
Deng pananganan per tahap, bageang jalang yang jadi kawenangan masing-masing pemerentah bisa karja iko kamampuan deng kawenangan.
Rovik deng tegas bilang, akses jalang marupakan bageang panting par tongka ekonomi warga. Jalang rusak paleng hambat pangangkutan hasil partanian. Laste-laste, iko pangaruh produksi deng distribusi warga.
Tagal itu, dia mo dorong par kabutuhan masyarakat Taeno Atas bisa maso dalam pambahasan program pambangunan sasuai kawenangan Pemerentah Provinsi Maluku.
Dia juga minta warga tetap sampekan parkambangan kondisi jalang, sahingga parsoalan itu bisa tarus daapa kawal dan seng tabrenti cuma sabatas aspirasi dalang agenda reses.
“Beta minta masyarakat tarus sampekan parkembangan kondisi jalang, sahingga proses pangawalan bisa barkelanjutan,” pinta Rovik. (Red/Merindu)
