AmbonVibes.com – Wakil Ketua DPRD Provinsi Maluku Johan Johanis Lewerissa ada pi toma sampe ka jurang kiri-kanan Bere-Bere, Kalurahan Batu Meja, Kacamatan Sirimau, Kota Ambon, Kamis (3/9/2026). Ini bukang jalang-jalang pasiar mar pake kasampatan reses par baku dapa warga di situ.
Seng parcuma Johan ka Bere-Bere. Di sana, dia dapa dengar langsung kasukaran warga, macang palayanan jenazah, kabutuhan sekretariat pemuda, saluran aer yang rusak, ancaman longsor, akses jalang yang sulit, deng parsoalan laeng. Acara baku dapa itu jadi kasampatan par warga RW 05, mulai dari RT 01 sampe RT 04, par sampekan langsung dong pung kabutuhan deng parsoalan yang dong tongka harhari.
Par Johan, reses bukang sakadar agenda dengar aspirasi. Satiap parsoalan yang warga sampekan, musti lia akang bardasarkan kawenangan, katantuan, deng kamampuan anggaran daerah, sabalong parjuangkan akang dalam proses pambangunan.
“Yang bisa katong biking, katong biking. Yang balong bisa, katong biking palang-palang. Saya seng mo janji yang tar jalas,” kata Johan.
Sikap itu kaliatang waktu warga molai ure satu par satu parsoalan yang dong dapa, bae manyangkut kabutuhan sosial, kapamudaan, mopun kondisi infrastruktur lingkungan.
Salah satu parsoalan yang dapa parhatian Johan adalah kondisi Yayasan Muhabet, organisasi yang salama ini bantu masyarakat dalang pelayanan jenazah.
Warga Bere-Bere Fin Hehanussa kastau, katerbatasan dana jadi salah satu kandala Muhabet dalang aktivitas palayanan.
Dengan iuran anggota yang cuma Rp10.000 per bulan, kabutuhan operasional sulit par dapa akang. Kondisi lebe barat waktu dalang sabulang, ada dua sampe tiga warga maninggal dunya. Yayasan Muhabet juga parlu kursi par tunjang palayanan par masyarakat.
Pas dengar akang, Johan langsung bantu kepeng Rp3 juta sakaligus komitmen bantu kebutuhan kursi bagi yayasan.
“Saya mo bantu Rp3 juta untuk Yayasan Muhabet. Untuk kursi juga nanti beta bantu,” ujar Johan.
Salaeng palayanan orang mati, persoalan kapemudaan juga jadi bageang dar aspirasi warga. Angkatan Muda GPM Ranting Anugerah yang menaungi dua sektor kapemudaan, ada mo bangong sekretariat. Mar katarbatasan biaya biking akang rencana balong jadi.
Johan minta pemuda lakas biking proposal pambangunan yang lengkap. Dokumen itu nantinya dia lia par dapa peluang malalui Pokok-Pokok Pikiran (Pokir) DPRD mopun skema hibah pemerintah pusat.
“Lakas biking siap akang pung proposal. Katong mo lia akang pung mekanisme, deng bagaimana parjuangkan iko katantuan,” kata Johan.
Salaeng persoalan sosial deng kapemudaan, kondisi infrastruktur lingkungan jadi salah satu parhatian warga. Warga nama Otis bilang, kondisi saluran aer di sapanjang kawasan jurang kiri-kanan akang molai rusak di sajumlah titik.
Saluran yang balubang sampe ambruk, dia khawatir akang pung dampak par kondisi jalang utama yang jadi akses panghubung kawasan Batu Meja manuju kampong-kampung di gunong.
Johan bilang, akang persoalan nanti dia koordinasi deng instansi teknis Pemerentah Provinsi Maluku. Manurut dia, paninjauan lapangan parlu par pastikan kondisi sabanarnya sakaligus dapa tau kabutuhan pananganan yang memang parlu.
“Katong mo koordinasi deng instansi teknis par turung lia kondisi saluran itu. Abis itu, baru bisa hitung akang pung kabutuhan pananganan,” jelas Johan.
Warga juga sampekan kabutuhan pambangunan fasilitas pelayanan jenazah. Fasilitas itu penting tagal kondisi parmukiman yang ada di kawasan tebing biking proses evakuasi atau pangangkutan jenazah seng gampang.
Mar Johan biking inga, pembangunan fasilitas publik musti molai deng status lahan yang jelas. Dia bilang, pemerentah seng boleh biking fasilitas publik di atas tanah status balong jalas tagal akang bisa jadi parsoalan hukom di balakang hari.
“Katong musti tau dapa pasti akang pung tanah. Status deng kapamilikan musti jelas, par kalo su bangong, seng ada masalah hokom nanti,” tegas Johan.
Dalang akang dialog, warga nama Bernie juga minta parhatian tarhadap parsoalan warga seng cuma muncul waktu anggota DPRD turung saat reses.
Manurut Barnie, masih ada sajumlah kabutuhan yang parlu dapa parhatiang, molai dar bahaya longsor, karusakan jalang, akses jalan satapak yang sempit deng bahaya, sampe kasulitan akses par warga lanjut usia.
Mananggapi barbage persoalan, Johan dorong masyarakat biking pendataan kebutuhan secara manyaluruh. Satiap persoalan, manurut dia, biking akang tartulis sahingga jadi dokumen pandukung dalang proses pangusulan program pambangunan.
Johan kastau, realisasi usulan pambangunan seng bisa instan. Satiap program musti iko tahapan mulai dari panyusunan usulan, parancanaan, panganggaran, sampe palaksanaan.
“Bisa saja usulan maso dalang parencanaan taong ini, mar akang pung palaksanaan baru taong muka. Samua malalui tahapan, deng iko atorang par aman, deng bisa par tanggongjawab akang,” ungkap Johan.
Johan meminta warga Bere-Bere tetap sampekan sakaligus kawal akang kabutuhan. Dia pastikan, aspirasi yang su dia tarima, dalam reses mo jadi bahan parjuangan iko skala prioritas, kawenangan, deng kamampuan anggaran yang tasadia.
“Katong seng bisa janji samua sakaligus, mar apa yang memang bisa katong parjuangkan, nanti katong parjuangkan,” tandas Johan. (Red/Merindu)
