AmbonVibes.com – Sampe oras 81 taong Indonesia Merdeka, orang laeng su nae kapal putih, pasawat jet, laeng su sampe bulan. Mar orang Wetar pung mimpi seng tinggi-tinggi. Justru biasa-biasa sa. Kalo bisa, kapal perintis bale singgah di Lirang jua. Juga kalo bisa, ada tambah Puskesmas Pambantu (Pustu).
Suara-suara orang biasa yang rindu kapal parintis, akang takaluar waktu Anggota DPRD Provinsi Maluku Anos Yermias, S.Sos., M.Si., biking agenda reses, baku dapa warga di Desa Karbubu Desa Karbubu, Kecamatan Wetar Barat, Kabupaten Maluku Barat Daya (MBD), Sabtu (5/9/2026).
Di acara baku dapa bacarita di Balai Desa Karbubu, ada Pemerintah Desa, tokoh masyarakat, dan warga. Warga pake kasampatan itu par bicara open-open deng dong pung wakil rakyat. Warga yang barane buka suara antara laeng, Kaleb Rahail, Yosep Cinde, Ot Uwaubun, Yonatan Masiba, Ipus Orno, deng Poly Kurmasela.
Parsoalan transportasi laut jadi salah satu aspirasi yang paleng banya dapa singgung. Warga harap, KM Sabuk Nusantara 87 bisa kumbali singgah di Palabuhan Lirang. Warga bilang paleng parlu sakali deng akang kapal supaya orang Wetar juga bisa tahubung deng tampa leang di luar Wetar.
Dong mangaku, akang kapal parintis jadi kabutuhan paleng dasar. Dong pung alasan, kapal parintis par warga bisa bula-bale ka sana-sini, juga par barang mopun kabutuhan pokok bisa maso dar luar. Bagitu lae, masyarakat pung produksi bisa bawa kaluar. Dar itu, warga rharap konektivitas palayaran bisa dapa kas kuat kumbali par biking agar aktivitas ekonomi deng mobilitas, jang sampe tahalang.
Salaeng parsoalan palayaran, warga juga sampekan kabutuhan bantuan alat tangkap par nelayan, par bantu aktivitas parikanan sakaligus biking bae ekonomi kaluarga. Warga usulan pambangunan tambatan parahu turut par dukung aktivitas transportasi laut dan kagiatan nelayan.
Kabutuhan laeng yang iko tarangka adalah persoalan aer barsih. Warga minta pemerentah tolong lia-lia warga pung aer barsih, tagal akang masih jadi masalah.
Di sektor parkabunan, masyarakat usul dukungan pangambangan komoditas kakao deng kalapa hibrida, bae malalui bantuan bibit nopun pandampingan par potensi parkebunan bisa maju lebe optimal.
Sadangkan di bidang kasehatan, warga harap paningkatan palayanan deng fasilitas Puskesmas Pembantu (Pustu) sahingga masyarakat bisa gampang dapa palayanan kesehatan.
Mananggapi barbage aspirasi, Anos Yeremias bilang reses itu ruang panting par anggota DPRD bisa dengar langsung kabutuhan masyarakat.
“Samua yang warga bilang ini, beta catat. Pulang reses, beta mo kas lanjut lalu koordinasi deng instansi takait sasuai kawenangan masing-masing,” kata Anos.
Dia bilang, kabutuhan masyarakat di pulau-pulau tarluar musti dapa parhatian sarius tagal kondisi geografis kapulauan pung tantangan yang laeng deng wilayah kontinental. Kata dia, pambangunan di kepulauan seng bisa pake pendekatan yang sama parsis deng yang di daratan.
“Par masyarakat kapulauan, transportasi laut itu kabutuhan dasar. Juga aer barsih, palayanan kesehatan, sarana parikanan, parkebunan, deng fasilitas pandukung yang laeng. Ini samua musti jadi parhatian barsama,” ujar Anos.
Anos juga sorot akang posisi Desa Karbubu sabage bageang dar wilayah parbatasan yang pung arti strategis dalang konteks kahadiran negara.
“Wilayah macang Karbubu itu NKRI pung foris. Tagal itu, masyarakat di sini juga musti dapa rasa palayanan nagara, pambangunan, deng pamarataan yang sama deng warga di daerah laeng,” tegas Anos.
Aspirasi yang jadi kawenangan Pemerintah Provinsi Maluku, manurut Anos, nanti mo kas tarus ka Organisasi Perangkat Daerah (OPD) tarkait. Sadangkan usulan yang jadi kawenangan Pemerentah Kabupaten deng Pemerintah Pusat, nanto mo kas tarus malalui koordinasi deng komunikasi, deng lembaga mopun kamenterian tarkait.
Anos kase apresiasi par warga Desa Karbubu yang su tarima dia pung kunjungan, sakaligus sampekan barbage parsoalan deng tabuka.
“Beta datang par dengar langsung masyarakat. Apa yang dong sampekan di sini bukang par jadi barang catat-catat, mar akang jadi bahan parjuangan dalang tugas deng tanggong jawab sabage Anggota DPRD Provinsi Maluku,” pungkas Anos.
Kunjungan itu jadi bageang dar rangkaian reses Anos Yeremias di sajumlah pulau deng desa di Kabupaten MBD serap langsung aspirasi rakyat. Dari Karbubu-Wetar Barat, suara warga di foris NKRI kumbale dapa tabaos par pemerentah bisa dengar akang.
Sakarang, akang pung tantangan itu mo tau pasti, suara-suara aros bawa ini akang tastop sabage catatan reses, ato ma pake akang par dasar kabijakan deng program yang batul-batul warga tarluar bisa dapa rasa akang. (Igo)
